خطے کی سلامتی پر پاکستان کویت مشاورت،فیلڈ مارشل عاصم منیر اور کویتی وزیر خارجہ کے درمیان اہم مذاکرات

راولپنڈی(ایگزو نیوز ڈیسک)کویت کے وزیر خارجہ شیخ جراح جابر الاحمد الصباح نے جنرل ہیڈکوارٹرز (جی ایچ کیو) کا دورہ کیا،جہاں انہوں نے فیلڈ مارشل اور چیف آف ڈیفنس فورسز سید عاصم منیر سے اہم ملاقات کی۔ملاقات میں پاکستان اور کویت کے درمیان دفاعی و سکیورٹی تعاون،علاقائی صورتحال اور باہمی دلچسپی کے امور پر تفصیلی تبادلہ خیال کیا گیا۔
پاک فوج کے شعبہ تعلقات عامہ (آئی ایس پی آر) کے مطابق جی ایچ کیو میں ہونے والی ملاقات کے دوران دونوں رہنماوں نے پاکستان اور کویت کے درمیان دیرینہ برادرانہ تعلقات کو مزید مستحکم بنانے اور مختلف شعبوں میں تعاون بڑھانے کے عزم کا اظہار کیا۔آئی ایس پی آر کے مطابق فیلڈ مارشل سید عاصم منیر اور کویتی وزیر خارجہ نے خطے کی مجموعی سلامتی کی صورتحال پر بات چیت کرتے ہوئے امن،استحکام اور خوشحالی کے مشترکہ اہداف کے حصول کے لیے تعاون جاری رکھنے پر اتفاق کیا۔ترجمان پاک فوج کے مطابق ملاقات میں دفاعی روابط کو مزید وسعت دینے، سکیورٹی تعاون کے فروغ اور دونوں ممالک کے درمیان موجود مضبوط شراکت داری کو نئی جہت دینے کے مختلف پہلووں کا جائزہ لیا گیا۔اس موقع پر فیلڈ مارشل سید عاصم منیر نے کہا کہ پاکستان اور کویت کے درمیان تعلقات تاریخی،برادرانہ اور باہمی احترام پر مبنی ہیں۔انہوں نے اس عزم کا اعادہ کیا کہ دونوں ممالک علاقائی امن،استحکام اور ترقی کے لیے مشترکہ وژن کے تحت تعاون کو مزید آگے بڑھاتے رہیں گے۔دوسری جانب کویتی وزیر خارجہ نے خطے میں امن و سلامتی کے لیے پاکستان کے کردار کو سراہتے ہوئے دونوں ممالک کے درمیان مضبوط تعلقات کو مزید فروغ دینے کی خواہش کا اظہار کیا۔ملاقات میں اس بات پر زور دیا گیا کہ پاکستان اور کویت کے درمیان دفاعی،سفارتی اور باہمی تعاون کے شعبوں میں روابط مستقبل میں بھی مزید مضبوط کیے جائیں گے جبکہ دونوں ممالک علاقائی امن و استحکام کے لیے اپنا مثبت کردار جاری رکھیں گے۔