پاکستان ہائی کمیشن نئی دہلی نے سکھ یاتریوں کو بابا گرو نانک دیو جی کی سالگرہ کی تقریبات میں شرکت کے لیے 3,000 سے زائد ویزے جاری کیے ہیں، جو 14 سے 23 نومبر تک پاکستان میں منعقد ہوں گی۔
ہائی کمیشن کے سوشل میڈیا پلیٹ فارم ایکس (سابقہ ٹویٹر) پر اپنے پیغام میں چارج ڈی افیئرز سعد احمد وڑائچ نے سکھ یاتریوں کو دل کی گہرائیوں سے مبارکباد پیش کی اور ان کے یاترا کے دوران خوشگوار تجربے کی خواہش ظاہر کی۔
یہ پیشرفت اس وقت ہوئی جب وفاقی وزیر داخلہ محسن نقوی نے پاکستان آنے والے سکھ یاتریوں کے لیے ویزا قوانین میں نرمی کا اعلان کیا۔ ان کے مطابق، سکھ یاتریوں کو ویزا فیس ادا کرنے کی ضرورت نہیں ہوگی اور وہ صرف نصف گھنٹے میں اپنا ویزا حاصل کر سکیں گے۔
امریکی سکھوں کے ایک گروپ کا خیرمقدم کرتے ہوئے محسن نقوی نے امریکی شہریوں کے لیے سفر کی آسانی پر زور دیا، جنہیں پاکستان پہنچتے ہی ویزا مل جاتا ہے اور وہ بآسانی متعدد بار پاکستان آ سکتے ہیں۔ انہوں نے یہ بھی ذکر کیا کہ برطانیہ اور کینیڈا کے شہریوں کے لیے ویزا حاصل کرنے کا عمل سادہ آن لائن طریقہ سے ممکن ہے۔
محسن نقوی نے اپنے پیغام میں کہا کہ ان کی خواہش ہے کہ پاکستان میں سکھ یاتریوں کی تعداد سالانہ ایک لاکھ سے بڑھا کر ایک ملین تک پہنچے، اور اس عمل میں نوجوان نسل کو خاص طور پر شامل کیا جائے۔ انہوں نے مزید کہا کہ حکومت نے 124 ممالک کے شہریوں کے لیے مفت ویزا سہولت فراہم کی ہے۔
سکھ یاتریوں نے وزیر داخلہ محسن نقوی کی میزبانی پر شکریہ ادا کیا اور آن لائن ویزا کے آسان عمل کی تعریف کی کرتے ہوئے کہا آپ نے ہمارے دل جیت لیے ہیں۔ انہوں نے پاکستان میں سرمایہ کاری کے مواقعوں میں دلچسپی ظاہر کی۔ اس موقع پر معروف صنعتکار کاشف اشفاق اور دیگر حکومتی افسران بھی موجود تھے۔