پاکستان کی میزبانی میں ہونے والی آئی سی سی چیمپئنز ٹرافی 2025 کا متوقع شیڈول منظر عام پر آگیا۔
شیڈول کے مطابق ایونٹ کا پہلا میچ 19 فروری کو پاکستان اور نیوزی لینڈ کے درمیان کراچی میں ہوگا جب کہ پاکستان اور بھارت کے درمیان میچ 23 فروری کو نیوٹرل مقام پر ہوگا۔
ذرائع نے بتایا کہ نیوٹرل وینیو ممکنہ طور پر دبئی ہو سکتا ہے۔ ایونٹ کے آغاز سے پہلے 12 سے 18 فروری تک چھ دن کی امدادی مدت مقرر کی گئی ہے۔ اس دورانیے میں پریکٹس سیشن اور ٹیموں کی آمد شامل ہوگی۔
ٹورنامنٹ کا پہلا سیمی فائنل 4 مارچ کو نیوٹرل مقام پر جبکہ دوسرا 5 مارچ کو پاکستان میں ہوگا۔ ایونٹ کا فائنل 9 مارچ کو ہوگا۔ اگر بھارت فائنل میں پہنچ گیا تو یہ کسی غیر جانبدار مقام پر ہوگا۔
اس ہفتے کے شروع میں آئی سی سی نے اعلان کیا تھا کہ چیمپئنز ٹرافی 2025 پاکستان اور ایک غیر جانبدار مقام پر کھیلی جائے گی۔ 2024 سے 2027 کے دوران آئی سی سی ایونٹس میں کسی بھی ملک کی میزبانی میں پاکستان اور بھارت کے میچ غیر جانبدار مقام پر کھیلے جائیں گے۔