وزیراعظم شہباز شریف کا کہنا ہے کہ پاک چین دوستی خطے اور عالمی امن و ترقی کے لیے ناگزیر ہے۔
انہوں نے ان خیالات کا اظہار چین کے سفیر جیانگ زیڈونگ سے گفتگو کرتے ہوئے کیا جنہوں نے اسلام آباد میں وزیراعظم سے ملاقات کی۔ شہباز شریف نے پاکستان اور چین کے درمیان تزویراتی تعلقات کو مسلسل بہتر بنانے اور چین پاکستان اقتصادی راہداری کو اپ گریڈ کرنے کے چینی قیادت کے وژن کی تعریف کی۔
وزیر اعظم نے پاکستان کی چین کے ساتھ انفارمیشن ٹیکنالوجی، مصنوعی ذہانت، جدید زراعت اور دیگر شعبوں میں تعاون بڑھانے کی خواہش کا اظہار کیا۔ انہوں نے کہا کہ پاکستان اور چین کی دوستی برسوں سے پائیدار اور مضبوط رہی ہے۔ شہباز شریف نے کہا کہ چین نے ہر مشکل وقت میں پاکستان کی غیر مشروط مدد کی ہے۔
واضح رہے کہ ملاقات میں نائب وزیراعظم محمد اسحاق ڈار، وزیراعظم کے معاون خصوصی طارق فاطمی اور دیگر متعلقہ حکام بھی موجود تھے۔