ڈھاکا: بنگلا دیشی عدالت نے کرکٹر شکیب الحسن کے اثاثے ضبط کرنے کا حکم دے دیا۔
غیر ملکی میڈیا کے مطابق، ڈھاکا کے ایڈیشنل چیف میٹروپولیٹن مجسٹریٹ ضیاء الدین رحمان نے پیر کے روز چیک باؤنس کیس میں شکیب الحسن کی جائیداد ضبط کرنے کا حکم دیا۔
شکیب الحسن نے 2016 میں ستکھیرا میں ایک کیکڑے کا فارم قائم کیا تھا، جو 2021 سے غیر فعال ہے۔ یہ چیکس بینک سے لیے گئے قرض کی ادائیگی کے لیے جاری کیے گئے تھے، مگر ناکافی فنڈز کی وجہ سے وہ باؤنس ہوگئے۔
رپورٹس کے مطابق، بنگلادیشی بینک نے اکتوبر 2024 میں چیک باؤنس پر قانونی نوٹس جاری کیا اور 24 دسمبر کو شکیب اور ان کی کمپنی کے تین دیگر عہدیداروں کے خلاف مقدمہ دائر کیا۔ جنوری میں عدالت نے شکیب کے وارنٹ گرفتاری جاری کیے تھے۔
شکیب الحسن سیاسی کشیدگی اور عوامی لیگ سے وابستگی کی وجہ سے جان سے مارنے کی دھمکیاں ملنے پر بنگلا دیش سے باہر ہیں۔ وہ گزشتہ سال حکومت مخالف مظاہروں میں نوجوان کے قتل کے مقدمے میں بھی نامزد ہیں۔