ڈی جی آئی ایس پی آر کی پریس کانفرنس پر ردعمل دیتے ہوئے پاکستان تحریک انصاف (پی ٹی آئی) کے رہنما عمر ایوب نے کہا کہ سابق آرمی چیف جنرل قمر جاوید باجوہ ہی تھے جنہوں نے کالعدم تحریک طالبان پاکستان (ٹی ٹی پی) کے ساتھ مذاکرات کی وکالت کی تھی۔
عمر ایوب کا یہ بیان ڈی جی آئی ایس پی آر کی پریس کانفرنس کے ایک دن بعد اس لیے سامنے آیا ہے کیونکہ لیفٹننٹ جنرل احمد شریف چوہدری نے کہا تھا کہ ملک میں دہشت گردی میں اضافے کی ذمہ دار عمران خان کی حکومت پر عائد ہوتی ہے۔
آئی ایس پی آر کے ڈائریکٹر جنرل نے گزشتہ روز کہا تھا کہ ملک کی سکیورٹی فورسز 2021 میں پی ٹی آئی کی زیرقیادت حکومت کی طرف سے کیے گئے فیصلوں کیلئے خون کی قیمت ادا کر رہی ہیں۔ انہوں نے کہا کہ پوری قوم بالخصوص خیبرپختونخوا کے شہری اس وقت کی حکومت کے مذاکرات کے ذریعے دہشت گردوں کی آبادکاری اور بحالی کی قیمت ادا کر رہے ہیں۔