پاکستان کی توانائی پیداوار بڑھانے کا بڑا قدم،او جی ڈی سی ایل اور امریکی کمپنی بیکر ہیوز میں اہم معاہدہ

اسلام آباد(ایگزو نیوز ڈیسک)اسلام آباد میں پاکستان کی توانائی ضروریات پوری کرنے اور مقامی تیل و گیس کی پیداوار بڑھانے کے لیے اہم پیش رفت سامنے آئی ہے، جہاں آئل اینڈ گیس ڈویلپمنٹ کمپنی لمیٹڈ (او جی ڈی سی ایل) اور امریکی انرجی ٹیکنالوجی کمپنی بیکر ہیوز کے درمیان میچور تیل و گیس اثاثوں سے پیداوار میں اضافے کے لیے معاہدہ طے پا گیا ہے۔
ایگزو نیوز کے مطابق معاہدے پر دستخط کی تقریب OGDCL ہیڈکوارٹرز اسلام آباد میں منعقد ہوئی،جس میں سپیشل سیکریٹری پٹرولیم مرزا ناصرالدین مشعود احمد، امریکی ناظم الامور نیٹلی اے بیکر، OGDCL کے منیجنگ ڈائریکٹر و چیف ایگزیکٹو آفیسر احمد حیات لک سمیت دونوں اداروں کے اعلیٰ حکام اور متعلقہ حکام نے شرکت کی۔معاہدے کا بنیادی مقصد OGDCL کے ایسے تیل و گیس اثاثوں کی پیداواری صلاحیت میں اضافہ کرنا ہے جو طویل عرصے سے آپریشن میں ہیں اور جن سے موجودہ حالات میں مزید پیداوار حاصل کرنے کے لیے جدید تکنیکی طریقوں اور پیداواری اصلاحات کی ضرورت ہے۔معاہدے کے تحت امریکی کمپنی بیکر ہیوز جدید ٹیکنالوجی اور تکنیکی مہارت کو بروئے کار لاتے ہوئے OGDCL کے میچور اثاثوں کی پیداواری کارکردگی بہتر بنانے اور ان سے زیادہ سے زیادہ پیداوار حاصل کرنے میں معاونت کرے گی۔OGDCL کے ترجمان کے مطابق یہ معاہدہ کمپنی کی جامع پروڈکشن آپٹیمائزیشن مہم کا حصہ ہے، جس کے دائرہ کار میں کمپنی کے مجموعی طور پر 18 میچور اثاثے شامل کیے گئے ہیں۔ ان میں 12 آئل فیلڈز اور 6 گیس فیلڈز شامل ہیں۔کمپنی کی موجودہ پیداواری صلاحیت کے حوالے سے بتایا گیا ہے کہ OGDCL اس وقت تقریباً یومیہ 40 ہزار بیرل خام تیل، 815 ایم ایم ایس سی ایف ڈی گیس اور 780 میٹرک ٹن ایل پی جی پیدا کر رہی ہے۔ معاہدے کے تحت میچور اثاثوں کی کارکردگی میں بہتری کے ذریعے ان پیداواری وسائل سے مزید استفادہ کرنے کی کوشش کی جائے گی۔OGDCL کے سربراہ احمد حیات لک نے اس موقع پر کہا کہ کمپنی ملک کی تیل و گیس پیداوار میں اضافے اور توانائی کے تحفظ کو مضبوط بنانے کے لیے عالمی معیار کی سروس اور ٹیکنالوجی فراہم کرنے والی کمپنیوں کے ساتھ شراکت داری کو فروغ دے رہی ہے۔انہوں نے امید ظاہر کی کہ بیکر ہیوز کے ساتھ طے پانے والے معاہدے پر مو¿ثر عملدرآمد سے کمپنی کے پرانے یا میچور اثاثوں کی پیداواری صلاحیت بہتر بنانے اور ان سے اضافی پیداوار حاصل کرنے میں مدد ملے گی۔دوسری جانب امریکی ناظم الامور نیٹلی اے بیکر نے معاہدے کو پاکستان اور امریکا کے درمیان توانائی کے شعبے میں تعاون کے حوالے سے اہم پیش رفت قرار دیا۔ اسپیشل سیکریٹری پٹرولیم مرزا ناصرالدین مشعود احمد نے بھی معاہدے کو ملک میں مقامی تیل و گیس کی پیداوار بڑھانے کی کوششوں کے لیے اہم قدم قرار دیا۔ماہرین کے نقطہ نظر سے میچور آئل اینڈ گیس اثاثوں سے اضافی پیداوار حاصل کرنا اس لیے اہم ہے کہ نئے ذخائر کی تلاش اور انہیں پیداواری مرحلے تک لانے کے مقابلے میں موجودہ اثاثوں کی پیداواری صلاحیت کو جدید ٹیکنالوجی کے ذریعے بہتر بنانا نسبتاً فوری نتائج فراہم کرسکتا ہے۔OGDCL اور بیکر ہیوز کے درمیان ہونے والی یہ شراکت داری ایسے وقت میں سامنے آئی ہے جب پاکستان اپنی توانائی کی ضروریات پوری کرنے، مقامی تیل و گیس کی پیداوار بڑھانے اور درآمدی توانائی پر انحصار کم کرنے کے لیے مختلف اقدامات کر رہا ہے۔معاہدے سے توقع کی جارہی ہے کہ جدید ٹیکنالوجی کے استعمال کے ذریعے موجودہ پیداواری اثاثوں کی استعداد میں بہتری آئے گی، مقامی توانائی کے وسائل سے زیادہ سے زیادہ فائدہ اٹھانے میں مدد ملے گی اور مستقبل میں ملک کی توانائی سلامتی کو مضبوط بنانے کی کوششوں کو تقویت ملے گی۔یوں OGDCL اور بیکر ہیوز کے درمیان طے پانے والا معاہدہ محض ایک تجارتی شراکت داری تک محدود نہیں بلکہ پاکستان کے موجودہ تیل و گیس اثاثوں سے زیادہ سے زیادہ پیداوار حاصل کرنے اور ملکی توانائی وسائل کو مو¿ثر انداز میں بروئے کار لانے کی حکمت عملی کا اہم حصہ قرار دیا جا رہا ہے۔