نیوزی لینڈ کے بیٹر راچن رویندرا نے آئی سی سی چیمپئنز ٹرافی میں بنگلادیش کے خلاف شاندار سنچری اسکور کرکے نئی تاریخ رقم کر دی۔
گزشتہ روز راولپنڈی کرکٹ اسٹیڈیم میں ہونے والے میچ میں راچن رویندرا نے 112 رنز کی اننگز کھیلی۔ اس میچ میں ان کا ڈیبیو تھا، کیونکہ وہ انجری کے باعث پاکستان کے خلاف افتتاحی میچ میں شریک نہیں ہو سکے تھے۔
راچن رویندرا نے اپنے ڈیبیو میچ میں چیمپئنز ٹرافی اور ورلڈکپ دونوں میں سنچری بنانے کا منفرد اعزاز حاصل کیا۔ وہ انٹرنیشنل کرکٹ میں پہلے کھلاڑی ہیں جنہوں نے دونوں ٹورنامنٹس میں ایسا کارنامہ انجام دیا۔
راچن کی یہ سنچری ان کی ون ڈے کرکٹ میں صرف 30 اننگز میں چوتھی سنچری تھی، اور ان کی تمام سنچریاں آئی سی سی ایونٹس میں آئی ہیں۔ 2023 ورلڈ کپ میں انہوں نے تین سنچریاں اسکور کیں۔
اب راچن رویندرا آئی سی سی ایونٹس میں سب سے زیادہ سنچریاں بنانے والے نیوزی لینڈ کے بیٹر بن گئے ہیں۔ اس سے قبل کین ولیمز اور نیتھن ایسٹل کے پاس تین سنچریوں کا ریکارڈ تھا۔