بچپن کی یادوں سے جڑی ہالی ووڈ کی مشہور فلم سیریز ہیری پوٹر اب ایک نئی ٹی وی سیریز کی صورت میں واپس آ رہی ہے۔ ایچ بی او نے باضابطہ طور پر اعلان کیا ہے کہ یہ سیریز نئی نسل کے اداکاروں کے ساتھ چھوٹی اسکرین پر قدم رکھے گی۔ کہانی وہی پرانی ہوگی، مگر کردار نئے ہوں گے۔
ٹی وی سیریز میں جادو، مہم جوئی اور دوستی کا وہی پرانا رنگ ہوگا، جو ہیری، ہرمائینی اور رون کے گرد گھومتا ہے۔ نئے کرداروں میں ڈومینک میکلافلن بطور ہیری پوٹر، اربیلا اسٹینٹن بطور ہرمائینی گرینجر، اور السٹر اسٹیوٹ بطور رون ویزلی شامل ہیں۔ ایچ بی او نے اپنے انسٹاگرام پیج پر ان نوآموز اداکاروں کا خیرمقدم کیا، اور انہیں ہوگورٹس اسکول میں داخلہ ملنے کی خوشخبری دی۔
اس شاندار موقع کے پیچھے ایک دلچسپ انتخابی عمل ہے، جس میں 30 ہزار سے زائد بچوں نے آڈیشن دیے۔ سیریز کی شو رنر فرانسسکا گارڈنر اور ہدایتکار مارک میلڈ نے خوشی کا اظہار کرتے ہوئے کہا کہ ان تینوں میں جوہر اور صلاحیت ہے جو اسکرین پر دیکھنے کے لائق ہے۔
نئی نسل کے ہیروز کے ساتھ ساتھ، معروف اداکار بھی شامل ہوں گے، جیسے جان لیتھگو جو پروفیسر ڈمبلڈور کا کردار نبھائیں گے۔ یہ سیریز جے کے رولنگ کے مشہور ناولوں پر مبنی ہوگی، اور خود رولنگ اس پراجیکٹ میں ایگزیکٹو پروڈیوسر کی حیثیت سے شامل ہوں گی۔
اگرچہ ٹی وی سیریز کی ریلیز کی تاریخ کا اعلان نہیں ہوا، لیکن یہ طے ہے کہ یہ پروجیکٹ جلد ہی ایچ بی او میکس پر پیش کیا جائے گا۔ مداحوں کو شدت سے انتظار ہے کہ آیا یہ نئی نسل بھی ہیری پوٹر کی جادوئی دنیا کو برقرار رکھ پائے گی۔