ملک بھر میں یوم دفاع و شہدا ملی جوش و جذبے کے ساتھ منایا جا رہا ہے۔
دن کا آغاز وفاقی دارالحکومت میں 31 اور صوبائی دارالحکومتوں میں 21 توپوں کی سلامی سے ہوا۔ مساجد میں ملک کی ترقی و خوشحالی اور مقبوضہ جموں و کشمیر کی آزادی کے لیے خصوصی دعائیں کی گئیں۔ کراچی میں قائداعظم محمد علی جناح کے مزار پر پاک فضائیہ کے چاق و چوبند دستے نے گارڈ آف آنر پیش کیا اور گارڈ کے فرائض سنبھالے۔ اس موقع پر شہداء کے لیے فاتحہ خوانی اور قرآن خوانی بھی کی جائے گی۔
واضح رہے کہ 1965 کو بھارتی افواج نے رات کی تاریکی میں بین الاقوامی سرحد عبور کر کے پاکستان پر حملہ کیا لیکن قوم نے دشمن کے مذموم عزائم کو ناکام بنا دیا۔ ہمارے بہادر سپاہیوں نے نہ صرف اپنی سرزمین کا دفاع کیا بلکہ ہزاروں شہریوں کی جانوں اور گھروں کی بھی حفاظت کی۔ لہٰذا قوم ان تمام قومی ہیروز کو خراج تحسین پیش کرتی ہے جنہوں نے اپنے فرائض کی انجام دہی میں اپنی جانوں کا نذرانہ پیش کیا۔
اس دن اس بات کا بھی اعادہ کیا جاتا ہے کہ پوری پاکستانی قوم اپنی مسلح افواج کے ساتھ مل کر مادر وطن کی حفاظت میں کوئی کسر نہیں چھوڑے گی۔ پاکستان اور بھارت 1965 کی جنگ کشمیر کے مسئلے پر لڑ چکے ہیں لیکن یہ مسئلہ ابھی تک دونوں ممالک کے درمیان حل طلب ہے۔