نادرا نے شناختی کارڈ منسوخی کا عمل آسان بنا دیا، شہریوں کے لیے نئی سہولتیں متعارف

اسلام آباد(ایگزو نیوز ڈیسک) نیشنل ڈیٹا بیس اینڈ رجسٹریشن اتھارٹی (نادرا) نے انتقال کر جانے والے افراد کے شناختی کارڈ کی منسوخی کے عمل کو مزید سہل اور آسان بنانے کے لیے اہم اصلاحات متعارف کرا دی ہیں،تاکہ شہریوں کو وراثت، پنشن اور دیگر قانونی معاملات میں پیچیدگیوں کا سامنا نہ کرنا پڑے۔
نادرا حکام کے مطابق شناختی کارڈ منسوخی کی فیس ختم کر دی گئی ہے تاکہ شہری کسی مالی رکاوٹ کے بغیر اپنے قریبی رشتے داروں کے انتقال کا اندراج کرا سکیں۔ اس کے ساتھ ہی صوبائی سول رجسٹریشن مینجمنٹ سسٹم (سی آر ایم ایس) کے ساتھ ڈیٹا شیئرنگ کے نظام کو مزید مستحکم کیا گیا ہے جبکہ وفات کی بائیومیٹرک تصدیق کو لازمی قرار دے دیا گیا ہے۔ اس اقدام سے جعلی یا غلط اندراجات کی شرح میں نمایاں کمی آئی ہے۔نادرا کا کہنا ہے کہ نئے نظام کے نفاذ کے بعد سے نتائج نہایت حوصلہ افزا ہیں، اموات کے اندراج میں تیزی آئی ہے اور خاندانی ریکارڈ درستگی کے ساتھ اپ ڈیٹ ہو رہا ہے۔مزید سہولت فراہم کرتے ہوئے نادرا نے پاک آئی ڈی ایپ میں وفات کے بعد شناختی کارڈ منسوخی کی درخواست دینے کی سہولت بھی شامل کر دی ہے۔ اس کے ذریعے کوئی بھی شہری گھر بیٹھے اپنے قریبی عزیز کی وفات کے اندراج اور کارڈ کی منسوخی کی کارروائی مکمل کر سکے گا۔ پنجاب کے تین اضلاع میں بطور پائلٹ پراجیکٹ پاک آئی ڈی ایپ کے ذریعے وفات کا اندراج بھی ممکن بنا دیا گیا ہے جبکہ آئندہ مرحلے میں پیدائش، شادی، طلاق اور وفات کے اندراج کی سہولت پورے ملک میں فراہم کی جائے گی۔نادرا نے شہریوں کے لیے ایپ میں خاندانی ریکارڈ دیکھنے اور غلطیوں کی نشاندہی کرنے کا نیا فیچر بھی متعارف کرایا ہے۔ یہ سہولت بالکل مفت فراہم کی جا رہی ہے تاکہ عوام اپنے ریکارڈ کو بروقت درست رکھ سکیں۔ادارے نے شہریوں سے اپیل کی ہے کہ وہ اپنی زندگی کے تمام اہم واقعات جیسے پیدائش، شادی، طلاق اور وفات کا اندراج بروقت کروائیں تاکہ قومی ڈیٹا بیس ہمیشہ درست، شفاف اور قابلِ اعتماد رہ سکے۔