لاہور: وفاقی وزیر داخلہ و نارکوٹکس کنٹرول محسن نقوی نے سعودی عرب سے پاکستانی خاندان کی رہائی اور وطن واپسی کیلئے ڈی جی اے این ایف میجر جنرل عبدالمعید اور ان کی ٹیم کو شاباش دی۔ کہا، محدود وسائل کے باوجود اے این ایف کی کارکردگی لائق ستائش ہے۔
وفاقی وزیرداخلہ و نارکوٹکس کنٹرول محسن نقوی کی زیر صدارت خصوصی اجلاس، اجلاس میں منشیات کی خرید و فروخت روکنے کیلئے اہم فیصلے کیے گئے۔ ڈی جی اے این ایف میجر جنرل عبدالمعید، ریجنل ڈائریکٹر اے این ایف بریگیڈئر سکندر حیات، ڈائریکٹر انفورسمنٹ بریگیڈئر عمران اور ڈائریکٹر انٹیلیجنس کرنل کامران نے اجلاس میں شرکت کی۔
وفاقی وزیر داخلہ و نارکوٹکس کنٹرول محسن نقوی نے ملک بھر میں تعلیمی اداروں میں منشیات کی فروخت کے خلاف جاری کریک ڈاؤن پر ڈی جی اے این ایف میجر جنرل عبدالمعید اور ان کی ٹیم کی کارکردگی کو سراہا ہے۔
محسن نقوی نے متعلقہ ادارے کو ہدایت کی ہے کہ وہ تعلیمی اداروں میں منشیات خصوصا آئس فروخت کرنے والے عناصر کے خلاف سخت کارروائی جاری رکھی جائے۔ اور منشیات کی سمگلنگ کی روک تھام کیلئے ائیر پورٹس پر چیکنگ مزید سخت کی جائے۔
وفاقی وزیر دفاع نے مزید کہا کہ سرحدی علاقوں میں ڈرونز کے ذریعے منشیات کا کاروبار کرنے والے عناصر کے خلاف بلاامتیاز ایکشن لیا جائے۔ منشیات کے بڑے ڈیلرز کو ہر صورت قانون کی گرفت میں لایا جائے۔