فٹبال کے بادشاہ لیونل میسی کے چاہنے والوں کی کمی نہیں، لیکن اس بار ان کی 98 سالہ منفرد مداح نے سب کو پیچھے چھوڑ دیا۔
‘گینگسٹر گرینی’ کے نام سے مشہور پالین کینا نے میسی کو شادی کی پیشکش کی، جس نے اس لمحے کو اسٹیڈیم اور سوشل میڈیا دونوں پر یادگار بنا دیا۔ یہ دلچسپ واقعہ اس وقت پیش آیا جب انٹر میامی فیفا کلب ورلڈ کپ کے آخری گروپ میچ میں پالمیراس کے خلاف میدان میں اتر رہی تھی۔ میچ شروع ہونے سے پہلے، جب میسی وارم اپ کر رہے تھے، تو ان کی نظر ایک بینر پر پڑی جس پر لکھا تھا: “میسی، کیا آپ مجھ سے شادی کریں گے؟”
یہ بینر پالین کینا کا محبت بھرا پیغام تھا، جسے دیکھ کر میسی کے چہرے پر مسکراہٹ پھیل گئی۔ اگرچہ انہوں نے خوش اخلاقی سے ہاتھ کے اشارے سے انکار کیا، مگر ان کی خوشی سب کچھ بیان کر گئی۔
پالین کینا، جو اپنے نواسے راس اسمتھ کے ساتھ بڑے اسپورٹس ایونٹس میں نظر آتی ہیں، کوئی عام دادی نہیں ہیں۔ چاہے وہ ڈبلیو ڈبلیو ای کا مقابلہ ہو یا این ایف ایل کا میچ، ‘گینگسٹر گرینی’ ہر جگہ اپنی موجودگی سے سب کو حیران کر دیتی ہیں۔
اس بار انہوں نے اسٹیڈیم میں موجود ہزاروں فینز کا دل نہیں بلکہ خود لیونل میسی کا دل جیت لیا۔ ان کا انسٹاگرام اکاؤنٹ پہلے ہی مقبول تھا، لیکن میسی کو شادی کی پیشکش کے بعد ان کے فالورز کی تعداد میں تیزی سے اضافہ ہو گیا ہے۔