لیونل میسی کی الجزائر کے خلاف شاندار ہیٹ ٹرک،ورلڈ کپ میں 16 گول کر کے کلوزے کا ریکارڈ برابر کر دیا

کنساس سٹی(ایگزو نیوز ڈیسک)فیفا ورلڈ کپ 2026 کے گروپ جے کے افتتاحی میچ میں ارجنٹائن کے کپتان اور عالمی شہرت یافتہ فٹبالر لیونل میسی نے شاندار کارکردگی کا مظاہرہ کرتے ہوئے نہ صرف اپنی ٹیم کو الجزائر کے خلاف 3-0 سے کامیابی دلائی بلکہ ورلڈ کپ تاریخ میں ایک اور بڑا سنگ میل بھی عبور کر لیا۔
ایگزو نیوز کے مطابق الجزائر کے خلاف میچ کے دوران لیونل میسی نے غیر معمولی کھیل پیش کرتے ہوئے اپنے ورلڈ کپ کیریئر کی پہلی ہیٹ ٹرک سکور کی، جس کے بعد ان کے ورلڈ کپ گولز کی مجموعی تعداد 16 تک پہنچ گئی اور وہ جرمنی کے سابق سٹرائیکر میروسلاو کلوزے کے ساتھ مشترکہ طور پر ٹورنامنٹ کی تاریخ کے سب سے زیادہ گول کرنے والے کھلاڑی بن گئے۔دلچسپ امر یہ ہے کہ یہ میچ اسی تاریخ کو کھیلا گیا جب 20 سال قبل میسی نے ورلڈ کپ میں اپنا ڈیبیو کیا تھا، جہاں انہوں نے سربیا اور مونٹی نیگرو کے خلاف پہلا گول سکور کیا تھا۔ اس تاریخی موقع نے میچ کو مزید یادگار بنا دیا۔میسی اس کارکردگی کے بعد دنیا کے ان چند کھلاڑیوں میں شامل ہو گئے ہیں جنہوں نے ورلڈ کپ کے پانچ مختلف ایڈیشنز میں گول سکور کیے ہیں، جو ان کے شاندار کیریئر کی ایک اور بڑی پہچان ہے۔میچ کے دوران پہلا گول اس وقت سامنے آیا جب میسی نے اپنے انٹر میامی کے ساتھی روڈریگو ڈی پال کے شاندار پاس پر گیند کو جال میں پہنچایا۔ دوسرے ہاف میں انہوں نے دوسرا گول سکور کیا جبکہ میچ کے آخری لمحات میں اپنی ہیٹ ٹرک مکمل کر کے شائقین کو حیران کر دیا۔ارجنٹائن کے کوچ لیونل اسکالونی نے میچ کے بعد میسی کی کارکردگی کو غیر معمولی قرار دیتے ہوئے کہا کہ ان کے پاس اس عظیم کھلاڑی کی تعریف کے لیے الفاظ نہیں ہیں۔میچ کے دوران گول سکور کرنے کے بعد میسی کی آنکھوں میں آنسو بھی دیکھے گئے، جس پر قیاس آرائیاں کی گئیں تاہم بعد ازاں انہوں نے واضح کیا کہ ان جذبات کا تعلق فٹبال سے نہیں بلکہ ان کی ذاتی زندگی کے ایک مشکل مرحلے سے تھا۔38 سالہ سٹار فٹبالر نے اپنی گفتگو میں کہا کہ وہ گزشتہ کچھ دنوں سے ایک پیچیدہ صورتحال سے گزر رہے تھے تاہم انہوں نے تفصیلات بتانے سے گریز کیا اور ساتھی کھلاڑیوں اور ٹیم مینجمنٹ کا شکریہ ادا کیا۔ارجنٹائن نے اس ورلڈ کپ کا آغاز بھرپور انداز میں کیا ہے اور میسی کی شاندار فارم نے ٹیم کے حوصلے مزید بلند کر دیے ہیں۔ اب فٹبال شائقین کی نظریں اس بات پر مرکوز ہیں کہ آیا میسی اس ٹورنامنٹ میں میروسلاو کلوزے کا ریکارڈ توڑ کر ورلڈ کپ تاریخ کے واحد سب سے زیادہ گول سکورر بن سکیں گے یا نہیں؟۔