مولانا فضل الرحمان کا امن و خیرسگالی کا فیصلہ،حکومتی اپیل پر جمعہ کے احتجاجی مظاہرے ملتوی

اسلام آباد(ایگزو نیوز ڈیسک)جمعیت علما اسلام کے سربراہ مولانا فضل الرحمان نے حکومت کی درخواست اور یقین دہانی کے بعد جمعہ کے لیے اعلان شدہ احتجاجی مظاہرے ملتوی کر دیے ہیں۔ یہ فیصلہ عوامی خدشات کے حل اور ملک میں جاری ایران،امریکا امن مذاکرات کی کامیابی کے پیشِ نظر لیا گیا۔ مولانا فضل الرحمان نے جماعتی مشاورت کے بعد مظاہرے موخر کرنے کا اعلان کیا اور عوام سے اپیل کی کہ وہ 12 اپریل کو مردان میں ہونے والے جلسے میں شرکت کریں، جہاں آئندہ لائحہ عمل کا اعلان کیا جائے گا۔
ایگزو نیوز کے مطابق جمعیت علما اسلام کے سربراہ مولانا فضل الرحمان نے پاکستان تحریک انصاف اور تحریک تحفظ آئین پاکستان کے بعد 9 اپریل کو راولپنڈی میں ہونے والے احتجاجی مظاہروں کے بعد اپنی جماعت کے بروز جمعہ کے مہنگائی مخالف مظاہرے ملتوی کرنے کا اعلان کر دیا۔ یہ فیصلہ وفاقی وزیر داخلہ محسن نقوی کی قیادت میں حکومت کے اہم وفد کی درخواست پر کیا گیا، جس میں رانا ثناءاللہ اور طارق فضل چوہدری بھی شامل تھے۔وفاقی وزیر داخلہ نے مولانا فضل الرحمان سے ان کی رہائش گاہ پر ملاقات کی اور انہیں بتایا کہ کل سے اسلام آباد میں ایران، امریکہ سمیت دنیا بھر کے اہم مہمان موجود ہوں گے، اور جنگ بندی کے مذاکرات کو حتمی شکل دینے کی کوششیں جاری رہیں گی۔ وزیراعظم میاں شہباز شریف کی جانب سے وفد نے جے یو آئی سے اپیل کی کہ مظاہرے ملتوی کیے جائیں تاکہ دنیا کو ایک مثبت اور تعمیری پیغام دیا جا سکے۔مولانا فضل الرحمان نے حکومتی وفد کو عوام میں پیٹرول کی قیمتوں میں اضافے سے پیدا ہونے والی بے چینی سے آگاہ کیا اور فوری کمی کا مطالبہ کیا۔ حکومتی وفد نے یقین دہانی کرائی کہ آئندہ چند روز میں پیٹرول کی قیمتوں میں کمی کی جائے گی۔جے یو آئی سربراہ نے جماعتی مشاورت کے بعد اعلان کیا کہ پیٹرول کی قیمتوں میں کمی کی یقین دہانی پر اور اسلام آباد میں جاری امن مذاکرات کی خاطر جمعہ کے مظاہرے موخر کر دیے گئے ہیں۔ انہوں نے عوام سے اپیل کی کہ وہ 12 اپریل 2026 کو مردان میں ہونے والے جلسے میں شرکت کریں، جہاں آئندہ کے لائحہ عمل کا اعلان کیا جائے گا۔مولانا فضل الرحمان نے دعا کی کہ اللہ پاک پاکستان اور عالمِ اسلام کو امن و سلامتی عطا فرمائے اور عالمی امن کے قیام میں مثبت کردار ادا کرے۔ یہ اقدام سیاسی اور سماجی ہم آہنگی کی ایک بڑی مثال کے طور پر دیکھا جا رہا ہے، جس سے پاکستان میں داخلی امن و استحکام کے لیے ایک مضبوط پیغام بھیجا گیا ہے۔