مستونگ(ایگزو نیوز ڈیسک)مستونگ کے علاقے کھڈکوچہ میں سیکیورٹی فورسز نے انٹیلی جنس بنیادوں پر کارروائی کرتے ہوئے فتنہ الہندوستان کے مزید 3 دہشتگردوں کو ہلاک کردیا،جس کے بعد آپریشن العزم کے دوران مارے جانے والے دہشتگردوں کی تعداد 16 ہوگئی ہے۔
سیکیورٹی ذرائع کے مطابق بلوچستان میں دہشتگردی کے خاتمے کے لیے جاری آپریشن العزم کے تحت مستونگ کے علاقے کھڈکوچہ میں خفیہ اطلاعات کی بنیاد پر کارروائی کی گئی،جس میں دہشتگردوں کے متعدد ٹھکانوں کو کامیابی سے نشانہ بنایا گیا۔ذرائع کے مطابق کارروائی کے دوران فتنہ الہندوستان کی کمین گاہیں تباہ کردی گئیں، جبکہ دہشتگردوں کے قبضے سے بڑی تعداد میں اسلحہ،گولہ بارود اور آئی ای ڈی تیار کرنے میں استعمال ہونے والا مواد بھی برآمد کیا گیا۔سیکیورٹی حکام کا کہنا ہے کہ آپریشن العزم کے دوران اب تک فتنہ الہندوستان کے 16 دہشتگرد ہلاک کیے جاچکے ہیں جبکہ متعدد دیگر دہشتگرد زخمی حالت میں موجود ہیں۔فورسز کی کارروائیوں کے باعث دہشتگرد تنظیم کے نیٹ ورک کو شدید نقصان پہنچا ہے۔
ذرائع کے مطابق بلوچستان میں امن و امان کی صورتحال بہتر بنانے اور دہشتگرد عناصر کے مکمل خاتمے کے لیے انٹیلی جنس بنیادوں پر آپریشنز کا سلسلہ جاری رہے گا۔سیکیورٹی فورسز ملک دشمن عناصر کے خلاف کارروائیاں مزید موثر انداز میں جاری رکھنے کے لیے پرعزم ہیں۔حکام کا کہنا ہے کہ دہشتگردی کے ناسور کے خاتمے اور عوام کے جان و مال کے تحفظ کے لیے ریاستی ادارے تمام دستیاب وسائل بروئے کار لا رہے ہیں جبکہ امن دشمنوں کے خلاف کارروائیوں میں مزید تیزی لائی جائے گی۔