لاہور ہائی کورٹ نے منگل کو لیفٹیننٹ جنرل منیر افسر کی بطور چیئرمین نادرا تقرری بحال کر دی۔
وفاقی حکومت کی جانب سے اٹارنی جنرل نے لاہور ہائی کورٹ کے سنگل رکنی بینچ کے اس فیصلے کو چیلنج کیا تھا جس میں لیفٹیننٹ جنرل منیر افسر کی بطور چیئرمین نادرا تقرری کالعدم قرار دی گئی تھی۔ لاہور ہائیکورٹ کے جسٹس چوہدری محمد اقبال کی سربراہی میں دو رکنی بنچ نے درخواست کی سماعت کی اور سنگل رکنی بینچ کا فیصلہ کالعدم قرار دے دیا۔ عدالت نے کیس میں فریقین کو جواب کے لیے نوٹس جاری کر دیئے۔
گزشتہ سال 2 اکتوبر کو لیفٹیننٹ جنرل منیر افسر کو نیشنل ڈیٹا بیس اینڈ ریگولیٹری اتھارٹی کا نیا چیئرمین مقرر کیا گیا تھا۔ وفاقی کابینہ نے وزارت داخلہ کے تجویز کردہ تین ناموں میں سے تقرری کی منظوری دی۔ کابینہ کو بتایا گیا کہ سلیکشن کمیٹی نے چیئرمین نادرا کے عہدے کیلئے تین بہترین امیدواروں کے نام شارٹ لسٹ کیے۔ تفصیلی غور و خوض کے بعد کابینہ نے لیفٹیننٹ جنرل محمد منیر افسر کو نادرا کا نیا چیئرمین مقرر کرنے کی منظوری دی۔
واضح رہے کہ یہ تقرری اس وقت کے نادرا کے سربراہ طارق ملک کی جانب سے وزیر اعظم شہباز شریف سے ملاقات کے بعد عہدے سے مستعفی ہونے اور باضابطہ طور پر اپنا استعفیٰ پیش کرنے کے بعد کی گئی تھی۔