خیبرپختونخوا میں بڑی مالی خوشخبری،معذور ملازمین کا الاونس دگنا،پنشن میں بھی اضافہ

اسلام آباد(ایگزو نیوز ڈیسک)خیبرپختونخوا کے محکمہ بلدیات نے سرکاری ملازمین، بالخصوص معذور افراد اور پنشنرز کے لیے مالی سہولتوں میں اضافے کا اعلان کرتے ہوئے اہم فیصلے کیے ہیں،جن کا مقصد موجودہ معاشی دباو کے تناظر میں ریلیف فراہم کرنا ہے۔
محکمہ بلدیات کی جانب سے جاری کردہ نوٹیفکیشن کے مطابق معذور سرکاری ملازمین کے خصوصی کنوینس الاونس میں نمایاں اضافہ کرتے ہوئے اسے 6 ہزار روپے سے بڑھا کر 10 ہزار روپے ماہانہ کردیا گیا ہے۔اس اضافے کا اطلاق یکم جولائی 2026 سے ہو گا،جس کے تحت اہل ملازمین کو نئی شرح کے مطابق ادائیگیاں کی جائیں گی۔حکام کے مطابق اس فیصلے سے نہ صرف لوکل کونسل بورڈ کے افسران و اہلکار مستفید ہوں گے بلکہ لوکل گورننس سکول،کیپٹل میٹروپولیٹن گورنمنٹ پشاور اور صوبے بھر کی تحصیل میونسپل ایڈمنسٹریشنز میں خدمات انجام دینے والے معذور ملازمین بھی اس سہولت سے فائدہ اٹھا سکیں گے۔الاونس کی ادائیگی فنانس ڈیپارٹمنٹ کی جانب سے مقرر کردہ قواعد و ضوابط کے مطابق کی جائے گی۔

یہ فیصلہ لوکل کونسل بورڈ کے اجلاس میں کیا گیا، جس میں ملازمین کو درپیش مالی مشکلات اور بڑھتی ہوئی مہنگائی کو مدنظر رکھتے ہوئے ریلیف اقدامات پر غور کیا گیا۔دوسری جانب محکمہ بلدیات نے پنشنرز کے لیے بھی اہم اعلان کرتے ہوئے لوکل کونسل بورڈ سے وابستہ تمام ریٹائرڈ ملازمین کی نیٹ پنشن میں 7 فیصد اضافہ کر دیا ہے۔اس اضافے کا دائرہ کار بھی وسیع رکھا گیا ہے،جس کے تحت لوکل کونسل بورڈ کے علاوہ لوکل گورننس سکول،کیپٹل میٹروپولیٹن گورنمنٹ پشاور اور خیبرپختونخوا کی تمام تحصیل میونسپل ایڈمنسٹریشنز کے پنشنرز شامل ہوں گے۔حکام کا کہنا ہے کہ الاونس اور پنشن میں یہ اضافہ موجودہ معاشی حالات میں سرکاری ملازمین اور ریٹائرڈ افراد کو مالی سہارا فراہم کرنے کے لیے کیا گیا ہے تاکہ ان کی روزمرہ ضروریات کو پورا کرنے میں آسانی ہو سکے۔واضح رہے کہ ایسے اقدامات نہ صرف ملازمین کی فلاح و بہبود میں مددگار ثابت ہوتے ہیں بلکہ اداروں کی کارکردگی پر بھی مثبت اثرات مرتب کرتے ہیں،خصوصاً جب یہ اقدامات مہنگائی اور معاشی دباو کے دور میں کیے جائیں۔