اسلام آباد میں پارٹی کے جلسے کے سلسلے میں مبینہ طور پر قانون کی خلاف ورزی پر پاکستان تحریک انصاف (پی ٹی آئی) کی قیادت کے خلاف کریک ڈاؤن کے تناظر میں خیبر پختونخوا کے وزیر اعلیٰ علی امین گنڈا پور گھنٹوں تک "لاپتہ” رہنے کے بعد پشاور پہنچ گئے۔
اس پیشرفت کی تصدیق پی ٹی آئی کے رکن قومی اسمبلی شاہد خٹک نے کی کہ وزیراعلیٰ پارٹی کے پاور شو کے بعد وفاقی دارالحکومت میں مختلف میٹنگز میں مصروف تھے۔
پی ٹی آئی کا کہنا تھا کہ گنڈا پور نے صوبے میں امن و امان کی صورتحال پر حکومتی عہدیداروں سے طویل میٹنگ کی اور مذکورہ میٹنگ کے مقام پر موبائل فون جیمرز کی وجہ سے ان سے رابطہ نہ ہو سکا۔
اس سے پہلے وزیراعلیٰ علی امین گنڈا پور کے مشیر برائے اطلاعات بیرسٹر محمد علی سیف نے دعویٰ کیا تھا کہ وفاقی حکومت نے انہیں حراست میں لیا ہے کیونکہ وہ پیر کی شام 6 بجے سے رابطے میں نہیں تھے۔