اسٹار بلے باز ویرات کوہلی کو آسٹریلوی اوپنر سیم کونسٹاس کو جان بوجھ کر کندھا مارنے پر میچ فیس کا 20 فیصد جرمانہ اور ایک ڈی میرٹ پوائنٹ دیا گیا ہے۔
یہ واقعہ میلبورن ٹیسٹ کے پہلے دن 10ویں اوور کے اختتام پر اس وقت پیش آیا جب کوہلی آسٹریلیا کے ڈیبیو کرنے والے کھلاڑی کے کندھے سے ٹکرائے، جس کے بعد دونوں کھلاڑیوں کے درمیان گرما گرم تبادلہ ہوا۔ دوسرے آسٹریلوی اوپنر عثمان خواجہ دونوں کھلاڑیوں کے درمیان ثالثی کی کوشش کرتے نظر آئے۔
کوہلی کے طرز عمل نے آسٹریلیا کے سابق کپتان رکی پونٹنگ سمیت کئی ماہرین کو ناراض کیا۔ سابق کپتان پونٹنگ نے ایک پروگرام میں کہا کہ ویرات نے ایک پوری پچ کو اپنے دائیں طرف چلایا اور اس تصادم کو بھڑکا دیا۔
سابق بھارتی کوچ روی شاستری نے بھی کوہلی کے طرز عمل کو ناپسند قرار دیتے ہوئے کہا کہ ہر کھلاڑی کی ایک لائن ہوتی ہے جو اُسے ہرگز تجاوز نہیں کرنی چاہتے۔
کونسٹاس، جنہوں نے شاندار ٹیسٹ ڈیبیو کیا تھا نے 65 گیندوں پر 60 رنز بنائے، اُن کی شاندار اننگز میں چھ چوکے اور دو چھکے شامل ہیں۔ اپنی اننگز میں کونسٹاس نے اپنے غیر روایتی اسٹروک پلے سے تماشائیوں کو متاثر کیا، انہوں نے جسپریت بمراہ کا مقابلہ بے دریغ کیا، جو اب تک سیریز کے بہترین باؤلر اور سب سے زیادہ وکٹیں لینے والے بولر ہیں۔
واضح رہے کہ بارڈر گواسکر ٹرافی کے باکسنگ ڈے ٹیسٹ کے پہلے روز آسٹریلیا کے تمام ٹاپ چار بلے بازوں نے اپنی نصف سنچریاں اسکور کیں۔ اسٹیو اسمتھ پہلے دن کے اختتام پر 68 پر ناٹ آؤٹ رہے۔ آسٹریلیا نے 6 وکٹوں کے نقصان پر 311 رنز بنا لیے ہیں۔ بھارت کی جانب سے بمراہ نے 75 رنز کے عوض تین وکٹیں حاصل کیں۔