پشاور(ایگزو نیوز ڈیسک)خیبرپختونخوا حکومت نے نگران دور میں پاکستان تحریک انصاف( پی ٹی آئی) کے ارکان اور کارکنان کے خلاف درج مقدمات واپس لینے کا فیصلہ کر لیا ہے۔ سرکاری ذرائع کے مطابق یہ اقدامات 9 اور 10 مئی کو ریڈیو پاکستان سمیت فوجی تنصیبات پر ہونے والے حملوں کے الزامات کے تحت درج کیے گئے مقدمات سے متعلق ہیں۔
ایگزو نیوز کے مطابق ایڈووکیٹ جنرل آفس نے صوبائی حکومت کو 51 مقدمات واپس لینے کی سفارشات بھیج دی ہیں۔ ان مقدمات میں سزا کی صورت میں اراکین اسمبلی کو نااہلی کا خدشہ موجود تھا، جس کے پیش نظر کابینہ کی منظوری کے بعد عدالتوں سے مقدمات واپس لینے کا عمل شروع کیا جائے گا۔ ریاست کے اس اقدام کے بعد دعویداری ختم کر دی جائے گی۔ایڈووکیٹ جنرل خیبرپختونخوا شاہ فیصل اتمان خیل نے میڈیا سے گفتگو میں تصدیق کی کہ 9 اور 10 مئی کے مقدمات سے متعلق سفارشات تیار کر کے صوبائی کابینہ کو بھیج دی گئی ہیں، اور حتمی فیصلہ کابینہ کرے گی۔ ان کے مطابق صوبے میں پی ٹی آئی کے 319 مقدمات میں سے 51 باقی ہیں، جن پر یہ کارروائی کی جائے گی۔یہ فیصلہ سیاسی کشیدگی کو کم کرنے اور قانونی پیچیدگیوں سے بچنے کے لیے اہم اقدام سمجھا جا رہا ہے جبکہ اس سے پی ٹی آئی کے متاثرہ ارکان اور کارکنان کی قانونی مشکلات میں کمی متوقع ہے۔
خیبرپختونخوا حکومت کا بڑا فیصلہ، نگران دور میں پی ٹی آئی پر 9 مئی مقدمات واپس لینے کی منظوری متوقع
5