برطانوی شہزادی پرنسز آف ویلز کیٹ مڈلٹن نے اپنے چاہنے والوں کو بتایا ہے کہ انہوں نے کینسر سے بچاو کی کیموتھراپی کا اپنا کورس مکمل کرلیا ہے۔
تفصیلات کے مطابق یہ خبر ونڈسر کے آفیشل اکاؤنٹ پر انسٹاگرام پر شیئر کی گئی۔ جہاں کیٹ مڈلٹن نے اپنے خاندان کے ہمراہ نئی ویڈیو بھی شیئر کی ہے۔
اس سال کے شروع میں کینسر کی ابتدائی تشخیص کے بعد سے، مستقبل کی ملکہ کا کیموتھراپی کے ذریعے علاج شروع کیا گیا تھا۔ کیٹ کا کہنا ہے کہ کیموتھراپی کا علاج مکمل کر کے اُن کو بہتر محسوس ہو رہا ہے۔ گزشتہ نو ماہ ہمارے خاندان پر بہت بھاری گزرے۔ انہوں نے کہا کہ کینسر کا سفر ہر ایک کے لیے پیچیدہ، خوفناک اور غیر متوقع ہے، خاص طور پر آپ کے قریب ترین لوگوں کے لیے۔
کیٹ مڈلٹن نے مزید کہا کہ اگرچہ میں نے کیموتھراپی مکمل کر لی ہے، لیکن شفا یابی اور مکمل صحت یابی میں وقت لگے گا۔ انہوں نے انکشاف کیا کہ وہ کام پر واپس آ رہی ہیں اور آنے والے مہینوں میں کچھ اور عوامی مصروفیات شروع کریں گی۔