بالی ووڈ اداکارہ اور بی جے پی کی رکن پارلیمنٹ کنگنا رناوت کا کہنا ہے کہ ان کی ہدایتکاری میں بنے والی پہلی فلم ‘ایمرجنسی’ کو ابھی تک سنسر بورڈ سے کلیئرنس سرٹیفکیٹ نہیں ملا ہے، جبکہ فلم کی ریلیز میں ایک ہفتے سے بھی کم وقت رہ گیا ہے۔
بھارتی میڈیا کے مطابق اداکارہ نے دعویٰ کیا ہے کہ سنسر بورڈ سے ابتدائی منظوری کے باوجود سینٹرل بورڈ آف فلم سے کلیئرنس سرٹیفکیٹ نہیں ملا ہے۔ اپنے انسٹاگرام اسٹوریز پر شیئر کیے گئے ایک ویڈیو پیغام میں انہوں نے کہا، افواہیں گردش کر رہی ہیں کہ میری فلم ایمرجنسی کو سنسر بورڈ نے سرٹیفکیٹ دے دیا ہے۔ لیکن یہ بات سچ نہیں ہے۔
کنگنا رناوت کی آنے والی فلم ‘ایمرجنسی’ بھارت کی سابق وزیراعظم اندرا گاندھی کی زندگی پر مبنی سیاسی تھرلر ہے۔ فلم کی ہدایت کار اور پروڈیوسر رناوت خود ہیں۔ اس کے علاوہ اداکارہ نے بھارت کی سابق وزیر اعظم کا مرکزی کردار بھی خود ہی ادا کیا ہے۔
واضح رہے کہ فلم 6 ستمبر کو دنیا بھر کے سینما گھروں میں ریلیز کی جائے گی۔