جمعیت علمائے اسلام ف (جے یو آئی ف) کے مرکزی رہنما حافظ حمد اللہ نے واضح طور پر کہا ہے کہ ان کی جماعت پاکستان تحریک انصاف (پی ٹی آئی) کی جانب سے پیش کردہ سول نافرمانی تحریک کی حمایت نہیں کرتی۔
نجی ٹی وی کے ایک پروگرام میں بات کرتے ہوئے انہوں نے کہا کہ پی ٹی آئی کے ساتھ کسی مشترکہ مہم میں شامل ہونے کا کوئی فیصلہ نہیں کیا گیا ہے۔ حافظ حمد اللہ نے مزید کہا کہ اگر پی ٹی آئی جے یو آئی ف سے مشترکہ تحریک کے لیے رابطہ کرتی ہے تو اس معاملے پر غور کیا جائے گا، تاہم سیاست میں کوئی بھی بات حتمی نہیں ہوتی۔
پی ٹی آئی کی حکمت عملی پر تنقید کرتے ہوئے حمد اللہ نے خبردار کیا کہ سول نافرمانی کی تحریک خود پی ٹی آئی کو سب سے زیادہ نقصان پہنچائے گی۔ ان کا یہ بیان اسد قیصر کے مولانا فضل الرحمان کے ساتھ حکومت مخالف متحدہ مہم کیلئے جاری رابطے کے دعووں کے جواب میں سامنے آیا ہے۔
واضح رہے کہ قیصر نے منگل کو پشاور میں میڈیا سے گفتگو کرتے ہوئے کہا تھا کہ ہم مولانا فضل الرحمان سے رابطے میں ہیں، ہم حکومت کے خلاف مشترکہ تحریک شروع کرنا چاہتے ہیں۔
دریں اثناء پی ٹی آئی رہنما شوکت یوسفزئی نے حکومت کی جانب سے سنجیدہ مذاکرات نہ کرنے کی صورت میں 14 دسمبر سے سول نافرمانی کی تحریک کا اعلان کرنے کی دھمکی دی ہے۔