آسٹریلیا کے سابق فاسٹ باؤلر جیسن گلیسپی نے حال ہی میں پاکستان کرکٹ ٹیم کے ریڈ بال ہیڈ کوچ کے عہدے سے اپنے استعفے کی وجہ بتائی ہے۔
جیسن گلیسپی کو پاکستان کرکٹ بورڈ (پی سی بی) نے اپریل 2024 میں دو سالہ مدت کیلئے تعینات کیا تھا۔ تاہم، گزشتہ ہفتے انہوں نے جنوبی افریقہ کے خلاف متوقع ٹیسٹ سیریز سے پہلے اپنے عہدے سے استعفیٰ دے دیا۔
گلیسپی کے استعفے کی وجوہات پر میڈیا میں متعدد رپورٹس آئیں، لیکن انہوں نے حال ہی میں ایک آسٹریلوی میڈیا کو انٹرویو میں اصل وجوہات بتائیں۔ انہوں نے کہا کہ جب میں نے یہ عہدہ سنبھالا تو میں یہ بات سمجھ چکا تھا کہ پاکستان نے بہت کم وقت میں متعدد کوچز کا تجربہ کیا ہے۔ میں نے اپنی بات رکھی اور بتایا کہ میں کس طرح مدد کر سکتا ہوں۔ آپ ایسا ماحول بنانا چاہتے ہیں جہاں کھلاڑی پرسکون لیکن مرکوز ہوں۔ میں سمجھتا ہوں کہ ٹیسٹ ٹیم اس راستے پر اچھی طرح چل رہی تھی۔
تاہم، پی سی بی کا ٹم نیلسن، ہائی پرفارمنس کوچ کے ساتھ بغیر کسی پیشگی بات چیت کے اچانک رشتہ ختم کرنا، گلیسپی کے استعفے کی وجہ بنی۔
جیسن گلیسپی نے کہا کہ یہ وہ لمحہ تھا جس نے میرے صبر کا پیمانہ لبریز کیا۔ ایک ہیڈ کوچ کے طور پر آپ کو اپنے آجر کے ساتھ واضح مواصلت کی ضرورت ہوتی ہے، اور میں ٹِم نیلسن کے ساتھ رشتہ ختم کرنے کے فیصلے سے بالکل حیران و پریشان تھا۔