تہران(ایگزو نیوز ڈیسک)اسرائیلی فضائی حملوں کی تازہ لہر نے ایران کے مختلف علاقوں میں خوف و ہراس کی فضا قائم کر دی ہے، جہاں رہائشی آبادی کو نشانہ بنائے جانے کے باعث درجنوں افراد جان کی بازی ہار گئے اور متعدد زخمی ہو گئے،دارالحکومت تہران سمیت کئی اہم شہروں میں دھماکوں اور تباہی کی اطلاعات نے نہ صرف انسانی بحران کو جنم دیا ہے بلکہ خطے میں بڑھتی ہوئی کشیدگی نے ایک ممکنہ وسیع جنگ کے خدشات کو بھی مزید گہرا کر دیا ہے۔
ایگزو نیوز کے مطابق ایران کے صوبہ البرز میں منگل کے روز ہونے والے شدید فضائی حملے میں کم از کم 18 افراد جاں بحق جبکہ 24 زخمی ہو گئے،جن میں خواتین اور بچے بھی شامل ہیں۔حملہ تہران کے شمال مغرب میں واقع رہائشی علاقوں پر کیا گیا،جس کے نتیجے میں متعدد عمارتیں ملبے کا ڈھیر بن گئیں اور امدادی کارروائیاں تاحال جاری ہیں۔ایرانی سرکاری خبر رساں ایجنسی کے مطابق حملوں کا اصل ہدف ابھی تک واضح نہیں ہو سکا تاہم ابتدائی اطلاعات کے مطابق سویلین آبادی کو نشانہ بنایا گیا۔ریسکیو ٹیمیں ملبے تلے دبے افراد کو نکالنے میں مصروف ہیں جبکہ زخمیوں کو قریبی ہسپتالوں میں منتقل کر دیا گیا ہے۔
دوسری جانب دارالحکومت تہران میں بھی متعدد دھماکوں کی اطلاعات موصول ہوئی ہیں جہاں ایک رہائشی عمارت کو نشانہ بنایا گیا۔حملے کی زد میں قریب واقع ایک یہودی عبادت گاہ بھی آ گئی جو مکمل طور پر تباہ ہو گئی جبکہ آس پاس کی عمارتوں کو بھی شدید نقصان پہنچا۔حکام کے مطابق تاحال اس مقام پر جانی نقصان کی تصدیق نہیں ہو سکی تاہم خدشہ ظاہر کیا جا رہا ہے کہ ملبے تلے افراد موجود ہو سکتے ہیں۔مغربی ایران کے شہر خرم آباد کے ہوائی اڈے اور پہاڑی علاقوں میں قائم اسلحہ ڈپووں پر بھی بمباری کی اطلاعات ہیں،جس کے بعد ملک بھر میں سیکیورٹی ہائی الرٹ کر دی گئی ہے۔جنوبی شہر شیراز میں ایک پیٹرو کیمیکل پلانٹ کو نشانہ بنانے کا دعویٰ بھی سامنے آیا ہے،جہاں مبینہ طور پر میزائل پروگرام سے متعلق مواد تیار کیا جا رہا تھا۔
اسرائیلی فوج نے ان کارروائیوں کی ذمہ داری قبول کرتے ہوئے کہا ہے کہ مختلف فوجی اور سٹریٹجک اہداف کو نشانہ بنایا گیا ہے جبکہ مزید حملوں کا عندیہ بھی دیا گیا ہے۔اسرائیلی حکام کے مطابق ایران کے ممکنہ جوابی اقدامات کے پیش نظر دفاعی نظام کو مکمل طور پر فعال کر دیا گیا ہے اور شہریوں کو ہنگامی ہدایات جاری کی گئی ہیں۔اس کے ساتھ ہی اسرائیل کی جانب سے ایران کے ریلوے نظام کو بھی ممکنہ ہدف قرار دیا گیا ہے،جسے اسلحے کی ترسیل کے لیے استعمال کیے جانے کا الزام عائد کیا گیا ہے۔سوشل میڈیا پر جاری پیغامات میں ایرانی شہریوں کو ٹرین سفر سے گریز کی ہدایت کی گئی ہے۔
ایرانی ہلالِ احمر نے ان حملوں کی شدید مذمت کرتے ہوئے انہیں کھلی جارحیت اور بین الاقوامی قوانین کی سنگین خلاف ورزی قرار دیا ہے۔ادارے کے مطابق ملک بھر میں کم از کم 17 سویلین مقامات کو نشانہ بنایا گیا،جس سے انسانی جانوں اور بنیادی ڈھانچے کو شدید نقصان پہنچا۔تجزیہ کاروں کا کہنا ہے کہ ان حملوں کا ایک مقصد عوامی دباو بڑھانا بھی ہو سکتا ہے تاہم اس کے برعکس امکان ہے کہ اس سے ایرانی عوام حکومت کے گرد مزید متحد ہو جائیں گے۔موجودہ صورتحال نے خطے میں کشیدگی کو ایک خطرناک سطح پر پہنچا دیا ہے اور کسی بھی بڑے تصادم کے خدشات میں اضافہ ہو گیا ہے۔