بیت المقدس: ( اسلم مراد ) اسرائیل کے چھ یرغمالیوں کی غزہ میں ہلاکت کے بعد اسرائیل کے مختلف شہروں اور علاقوں میں یرغمالیوں کی رہائی اور حماس کے ساتھ معاہدے کے لیے بڑے پیمانے پر مظاہرے شروع ہوچکے ہیں۔ کاروباری تنظیموں، تاجر تنظیموں، اپوزیشن کی جماعتوں اور طلبہ تنظیموں نے بھی ان مظاہروں کی حمایت کا اعلان کیا ہے اور اسرائیل کے وزیر اعظم پر زور دیا ہے کہ وہ حماس کے ساتھ فوری جنگ بندی کے معاہدے پر دستخط کریں۔
تفصیلات کے مطابق غزہ میں حماس کی قید میں چھ یرغمالیوں کی لاشیں ملنے کا انکشاف ہوا ہے حماس کا کہنا ہے کہ وہ اسلامی قوانین کے مطابق قیدیوں سے نہایت اچھا سلوک کرتے ہیں یہ قیدی اسرائیل کی جانب سے فضائی بمباری میں جاں بحق ہوئے ہیں ۔ ان کے اہل خانہ سخت پریشان ہیں اور ایسے وقت میں ہر جانب سے حماس کے ساتھ معاہدے کے لیے آوازیں اٹھنا شروع ہوگئی ہیں۔
حماس کا کہنا ہے کہ وہ پرانی شرائط پر جنگ بندی کے لیے رضامند ہے لیکن نئی شرائط کو کسی صورت بھی قبول نہیں کیا جائے گا جبکہ اسرائیل فی الحال جنگ بندی میں سنجیدہ نہیں ہے ۔