صفائی پر کوئی سمجھوتہ نہیں،شیف اور ویٹرز کیلئے سیفٹی کیپ لازم،خلاف ورزی پر سخت کارروائی،اسلام آباد فوڈ اتھارٹی نے ریسٹورنٹس کیلئے ایس او پیز نافذ کر دیئے

لاہور(ایگزو نیوز ڈیسک)وفاقی دارالحکومت میں شہریوں کو صاف ستھرا اور معیاری کھانا فراہم کرنے کے لیے فوڈ اتھارٹی نے ریسٹورنٹس اور فوڈ پوائنٹس کے لیے حفظانِ صحت سے متعلق نئی سخت ایس او پیز جاری کر دی ہیں۔
ایگزو نیوز کے مطابق نئی ہدایات کے تحت اب تمام شیف، ویٹرز اور فوڈ ہینڈلنگ سٹاف کے لیے سیفٹی کیپ پہننا لازمی قرار دیا گیا ہے۔ ایس او پیز میں واضح کیا گیا ہے کہ کوئی بھی عملہ کھانا تیار کرنے یا پیش کرنے کے دوران کیپ کے بغیر کام نہیں کر سکے گا۔فوڈ اتھارٹی کے مطابق یہ اقدام صفائی کے عالمی اصولوں پر سختی سے عمل درآمد اور شہریوں کو صحت مند، جراثیم سے پاک خوراک فراہم کرنے کے لیے اٹھایا گیا ہے۔ اتھارٹی نے خبردار کیا ہے کہ قواعد کی خلاف ورزی کرنے والے ریسٹورنٹس یا فوڈ پوائنٹس کو فوری طور پر سیل کر دیا جائے گا۔ شہریوں سے اپیل کی گئی ہے کہ اگر کسی ہوٹل یا فوڈ پوائنٹ پر عملہ کیپ کے بغیر کام کرتا نظر آئے تو فوری طور پر فوڈ اتھارٹی کو اطلاع دیں تاکہ کارروائی کی جا سکے۔ڈائریکٹر فوڈ اتھارٹی نے انسپکشن ٹیموں کو ہدایت دی ہے کہ وہ اسلام آباد کے تمام سیکٹرز میں سرپرائز چیکنگ کریں اور ایس او پیز پر مکمل عمل درآمد کو یقینی بنائیں۔انہوں نے کہا کہ شہریوں کا تعاون اس مہم کی کامیابی کے لیے کلیدی اہمیت رکھتا ہے، صاف ستھرا کھانا فراہم کرنا ہم سب کی مشترکہ ذمہ داری ہے۔فوڈ اتھارٹی نے مزید واضح کیا کہ” صحت مند اسلام آباد“ کے لیے یہ مہم جاری رہے گی اور کسی بھی ادارے کو صفائی کے معیار پر سمجھوتہ کرنے کی اجازت نہیں دی جائے گی۔