تہران (اسلم مراد ) امریکا اور اُس کے اتحادیوں کی پابندیوں کے باوجود ایران دنیا میں سب سے سستی بجلی دینے والا ملک بن گیا ہے۔
پاکستان میں بجلی بحران انتہائی خطرناک صورت حال اختیار کرگیا ہے اور متوسط اور غریب طبقے کے لیے مہنگے بل دینا عملی طور پر ناممکن ہوچکا ہے ایسے میں اگر کہیں سے یہ خبر سامنے آجائے کہ سب سے سستی بجلی آپ کے ہمسائے میں ہی مل رہی ہے تو یقین مانیں دل اداس ہوجاتا ہے کہ ہم سے اتنے قریب دنیا کی سستی ترین بجلی موجود ہے اور ہم ہیں کہ دنیا کی مہنگی ترین بجلی استعمال کررہے ہیں۔
عالمی سطح پر دنیا کی سستی ترین بجلی فراہم کرنے والے ممالک کی فہرست مرتب کی گئی ہے اور حیرت انگیز طور پر اس فہرست میں سعودی عرب ، کویت ، اومان ، بحرین ، یا متحدہ عرب امارات بالکل شامل نہیں ہیں بلکہ دنیا بھر میں سستی ترین بجلی فراہم کرنے میں ایران پہلے نمبر پر آگیا ہے۔ جہاں پاکستانی روپوں کے مطابق بجلی 56پیسے فی یونٹ دستیاب ہے۔ اسی فہرست میں دوسرے نمبر پر شورش زدہ ملک شام ہے جہاں ایک جانب جنگ کے سائے منڈلارہے ہیں لیکن اس کے باوجود بجلی انتہائی سستی ہے اور پاکستانی روپوں کے مطابق شام میں بجلی 83 پیسے فی یونٹ دستیاب ہے۔
اسی طرح کیوبا میں بجلی پاکستانی روپوں کے مطابق ایک روپے 67پیسے فی یونٹ دستیاب ہے۔ جبکہ فہرست میں چوتھے اور پانچویں نمبر پر سوڈان اور ایتھوپیا واقع ہیں جہاں بجلی 67پیسے فی یونٹ دستیاب ہے۔
واضح رہے کہ دنیا میں مہنگی ترین بجلی پاکستان کے عوام حاصل کررہے ہیں ۔ جہاں بجلی سو روپے فی یونٹ تک بھی ملتی ہے۔