بھارتی اداکارہ اور ریئلیٹی ٹی وی اسٹار شیفالی جریوالہ، جو گانے ‘کانٹا لگا’ میں اپنی شاندار ڈانس پرفارمنس سے مشہور ہوئیں، 42 سال کی عمر میں انتقال کر گئیں۔
بھارتی میڈیا کے مطابق، شیفالی کو جمعرات کی رات اچانک دل کا دورہ پڑا۔ انہیں فوری طور پر ان کے شوہر پراگ تیاگی اور تین دیگر افراد کے ہمراہ ممبئی کے اسپتال منتقل کیا گیا، لیکن وہ جانبر نہ ہو سکیں۔ اسپتال کے عملے نے تصدیق کی کہ وہ اسپتال لائے جانے سے پہلے ہی انتقال کر چکی تھیں۔
اگرچہ موت کی حتمی وجہ کا باضابطہ اعلان نہیں کیا گیا، ابتدائی طور پر دل کا دورہ ہی بنیادی وجہ قرار دی جا رہی ہے۔
شیفالی جریوالہ 2002 میں ‘کانٹا لگا’ کی ویڈیو سے راتوں رات شہرت کی بلندیوں پر پہنچیں اور بعد میں نچ بلیے اور بگ باس 13 جیسے شوز میں بھی شرکت کی۔ ان کی اچانک موت نے شوبز انڈسٹری اور ان کے مداحوں کو گہرے صدمے میں مبتلا کر دیا ہے۔