بھارت سیمی فائنل میں پہنچ گیا،ویسٹ انڈیز کو 5 وکٹوں سے شکست،سنجو سیمسن کی ناقابل شکست اننگز

کلکتہ(ایگزو نیوز ڈیسک)ہندوستان کے شہر کلکتہ میں کھیلے گئے آئی سی سی ٹی ٹوئنٹی ورلڈکپ کے سپر 8 مرحلے کے گروپ 1 کے اہم میچ میں بھارت نے ویسٹ انڈیز کو 5 وکٹوں سے شکست دے کر سیمی فائنل کے لیے کوالیفائی کر لیا، اس فتح کے ساتھ ورلڈکپ سیمی فائنلسٹ کی لائن اپ مکمل ہو گئی ہے، جس میں انگلینڈ، نیوزی لینڈ، جنوبی افریقا اور بھارت شامل ہیں۔
ایگزو نیوز کے مطابق میچ میں بھارت نے ٹاس جیت کر پہلے فیلڈنگ کا فیصلہ کیا۔ ویسٹ انڈیز نے مقررہ 20 اوورز میں 4 وکٹوں کے نقصان پر 195 رنز سکور کیے۔ ان کی جانب سے روسٹن چیز نے 40، جیسن ہولڈر نے 37، رومان پاول نے 34، اور شائی ہوپ نے 32 رنز بنائے۔ بھارت کی جانب سے جسپریت بھمراہ نے عمدہ بولنگ کا مظاہرہ کرتے ہوئے 2 وکٹیں حاصل کیں۔بھارت نے 196 رنز کا ہدف 20ویں اوور میں 5 وکٹوں کے نقصان پر پورا کیا۔ سنجو سیمسن نے ناقابل شکست 97 رنز کی اننگز کھیلی، جبکہ تلک ورما نے 27 اور ہاردک پانڈیا نے 17 رنز کا اضافہ کیا۔ سوریا کمار یادیو 18، اور ایشان کشن و ابھیشیک شرما نے 10-10 رنز بنائے۔میچ میں بھارت کی فتح نہ صرف ویسٹ انڈیز کو ورلڈکپ سے باہر کر گئی بلکہ ٹیم کی بہترین کارکردگی، خاص طور پر سنجو سیمسن کی شاندار بیٹنگ، نے شائقین کے دل جیت لیے۔ سیمی فائنل میں بھارت کا انگلینڈ کے ساتھ مقابلہ ایک زبردست ٹاکرا ہونے کی توقع ہے، جس کے لیے شائقین کی دلچسپی اپنے عروج پر ہے۔یہ میچ بھارت کے لیے سنسنی خیز اور ڈرامائی رہا، اور ٹی ٹوئنٹی ورلڈکپ کے سیمی فائنل میں پہنچنے کے ساتھ ٹیم نے عالمی سطح پر اپنی صلاحیتوں کا لوہا منوا دیا۔اس کامیابی کے بعد سیمی فائنل کے میچز کی تفصیل بھی سامنے آ گئی ہے،پہلا سیمی فائنل جنوبی افریقا بمقابلہ نیوزی لینڈ 4 مارچ کو کھیلا جائے گا جبکہ دوسرے سیمی فائنل کا میدان بھارت بمقابلہ انگلینڈ 5 مارچ کو سجے گا ۔