سابق وزیراعظم عمران خان نے جناح ہاؤس حملہ کیس سمیت 9 مئی کے واقعات سے متعلق 8 مقدمات میں ضمانت کیلئے لاہور ہائی کورٹ (ایل ایچ سی) سے رجوع کرلیا۔
درخواست میں کہا گیا کہ جس دن یہ واقعات پیش آئے عمران خان اس دن اسلام آباد میں نیب کی حراست میں تھے اور انہیں سیاسی انتقام کے تحت مقدمات میں جھوٹا پھنسایا گیا۔ مزید کہا گیا کہ وہ دو سال سے ان مقدمات کا سامنا کر رہے ہیں اور ان قانونی کارروائیوں کا شکار ہیں۔
درخواست میں لاہور ہائیکورٹ سے استدعا کی گئی ہے کہ تمام آٹھ مقدمات میں ضمانت منظور کی جائے اور ان کی رہائی کا حکم دیا جائے۔
یہ امر قابل ذکر ہے کہ لاہور کی انسداد دہشت گردی کی عدالت اس سے قبل ان مقدمات میں ضمانت کی درخواستیں مسترد کر چکی ہے۔ عمران خان لاہور میں 9 مئی کے واقعات سے متعلق 12 مقدمات میں نامزد ہیں جب کہ ان میں سے 4 میں انہیں پہلے ہی ضمانت مل چکی ہے۔