پاکستان تحریک انصاف (پی ٹی آئی) کے بانی کے حق میں امریکی بیانات پر بات کرتے ہوئے چیئرمین پاکستان پیپلز پارٹی بلاول بھٹو زرداری نے کہا عمران صرف ایک بہانہ، اصل ہدف ایٹمی پروگرام ہے۔
سابق وزیراعظم بے نظیر بھٹو کی 17ویں برسی کے موقع پر گڑھی خدا بخش میں عوامی اجتماع سے خطاب کرتے ہوئے بلاول نے کہا کہ ہمیں پاکستان کے خلاف کی جا رہی سازش سے نمٹنے کیلئے متحد ہونا ہو گا۔ ہمیں سیاست کو ایک طرف رکھتے ہوئے پاکستان اور اس کے دفاع کے بارے میں سوچنا ہوگا۔ بین الاقوامی طاقتیں ذوالفقار علی بھٹو اور بینظیر بھٹو کی طرف سے تحفے میں دی گئی ایٹمی ٹیکنالوجی پر بری نظر ڈال رہے ہیں۔
پاکستان کے اندرونی معاملات میں غیر ملکی مداخلت پر برہمی کا اظہار کرتے ہوئے، پی پی پی کے چیئرمین نے کہا کہ ہماری داخلی سیاست کے بارے میں امریکہ کی جانب سے بیانات جاری کیے جا رہے ہیں۔ یہ بیانات محض بہانے ہیں۔
انہوں نے کہا کہ امریکی قانون سازوں کا پاکستان میں جمہوریت سے کوئی تعلق نہیں، انہوں نے مزید کہا کہ پی ٹی آئی کے بانی صرف ایک بہانہ ہیں، ان کا اصل ہدف پاکستان کا ایٹمی اور میزائل پروگرام ہے۔
پی پی پی رہنما نے تعجب کا اظہار کیا کہ جو لوگ پاکستان کے ایٹمی پروگرام کے خلاف بیانات دیتے رہے تھے وہ اب خان کی رہائی کے لیے کیوں آوازیں اٹھا رہے ہیں۔
انہوں نے کہا کہ پی ٹی آئی اور اس کے بانی کو ان بیانات کی مذمت کرنی چاہیے۔ ایسے لگتا ہے جیسے ایک مخصوص لابی ملک میں ایک ایسی حکومت لانا چاہتی ہے جو کسی بھی چیز پر معاہدہ کرنے کیلئے تیار ہو بشمول جوہری پروگرام۔
اتفاق رائے سے فیصلے کرنے کی ضرورت پر زور دیتے ہوئے بلاول نے کہا کہ مسلم لیگ (ن) کی قیادت میں حکومت کے پاس یکطرفہ فیصلے کرنے کا مینڈیٹ نہیں ہے۔