لاہور: ملک میں بجلی کی قیمتوں میں کمی کا امکان، آئی ایم ایف نے حکومتی تجویز مان لی۔
ذرائع وزارت توانائی کے مطابق آئی ایم ایف کے ساتھ اپریل اور مئی سے دو روپے فی یونٹ کمی کا پلان شیئر کیا گیا۔ مذاکرات میں وزارت توانائی حکام کیساتھ ٹیرف ری بیسنگ پر بات چیت کی گئی۔ بجلی کی قیمت میں کمی پر آئی ایم ایف نے گرین سگنل دیا۔
ذرائع نے بتایا کہ آئی ایم ایف نے نیپرا اور وزارت توانائی کو مشاورت کیساتھ فیصلہ کرنے کا اختیار دیا۔ نیپرا اور وزارت توانائی کی جانب سے قیمت میں کمی کا فیصلہ آئندہ ماہ ہو سکے گا۔ حکام کی جانب سے مشن کے ساتھ ڈسکوز کی نجکاری کا پلان بھی شیئر کیا۔ آئی ایم ایف نے جنوری تک 2 ڈسکوز کی نجکاری نہ ہونے پر سخت تشویش کا اظہار کیا۔
آئی ایم ایف کی جانب سے نیپرا ایکٹ میں ترمیم کی تجویز کی مخالفت کی گئی ہے۔ وزارت توانائی کی جانب سے نیپرا ایکٹ میں ترمیم پیش کی گئی تھی۔ آئی ایم ایف مشن کیساتھ پاور سیکٹر کے گردشی قرضے پر اہم مذاکرات آج ہوں گے۔ ایف بی آر ریونیو، زرعی انکم ٹیکس، پراپرٹی ٹیکس اور ساورن ویلتھ فنڈ پر مذاکرات ہوں گے۔ گورننس پر مذاکرات کیلئے عید کے بعد آئی ایم ایف کا ایک اور وفد پاکستان آ سکتا ہے۔