آئی سی سی ٹیسٹ رینکنگ جاری،ٹریوس ہیڈ بدستور نمبر ون،پاکستان ٹاپ ٹین سے باہر

ابوظہبی(ایگزو نیوز ڈیسک)انٹرنیشنل کرکٹ کونسل (آئی سی سی) نے ہفتہ وار پلیئرز رینکنگ جاری کر دی ہے جس میں ٹیسٹ بیٹنگ کے شعبے میں آسٹریلیا کے ٹریوس ہیڈ نے بدستور پہلی پوزیشن برقرار رکھی ہے جبکہ دیگر کھلاڑیوں کی درجہ بندی میں نمایاں رد و بدل دیکھنے میں آیا ہے۔سری لنکا کے ابھرتے ہوئے بیٹر کمیندو مینڈس نے شاندار کارکردگی کے باعث دو درجے ترقی حاصل کرتے ہوئے چھٹی پوزیشن سنبھال لی ہے،جو ان کے کیریئر کی اہم پیش رفت قرار دی جا رہی ہے۔
رینکنگ کے مطابق ٹاپ ٹین ٹیسٹ بیٹرز کی فہرست میں پاکستان کا کوئی بھی کھلاڑی جگہ بنانے میں کامیاب نہیں ہو سکا،جو قومی ٹیم کی بیٹنگ لائن کے لیے تشویشناک اشارہ سمجھا جا رہا ہے۔دوسری جانب ویسٹ انڈیز کے جسٹن گریوز نے غیر معمولی بہتری دکھاتے ہوئے 14 درجے ترقی حاصل کی اور 49 ویں نمبر پر پہنچ گئے جبکہ ان کے ہم وطن شائے ہوپ بھی چھ درجے ترقی کے بعد 51 ویں پوزیشن پر آ گئے ہیں۔آئی سی سی کی تازہ رینکنگ میں یہ تبدیلیاں حالیہ بین الاقوامی میچز میں کھلاڑیوں کی کارکردگی کی عکاسی کرتی ہیں اور آنے والے مقابلوں میں مزید اتار چڑھاو کا امکان ظاہر کیا جا رہا ہے۔