دبئی(ایگزو نیوز ڈیسک)انٹر نیشنل کرکٹ کونسل(آئی سی سی )کی تازہ ون ڈے پلیئرز رینکنگ جاری ہونے کے بعد عالمی کرکٹ میں ایک بار پھر بیٹنگ، بولنگ اور آل راونڈ کارکردگی کے نئے توازن کی تصویر سامنے آ گئی ہے، جہاں نیوزی لینڈ کے ڈیرل مچل بدستور بیٹرز کی فہرست میں سرفہرست ہیں جبکہ پاکستان کے بابر اعظم ایک درجہ بہتری کے ساتھ ٹاپ 6 میں واپسی کر کے نمایاں ہو گئے ہیں۔ اسی طرح بولرز میں افغانستان کے راشد خان کی حکمرانی برقرار ہے جب کہ دیگر کھلاڑیوں کی درجہ بندی میں نمایاں اتار چڑھاو نے آنے والے مقابلوں سے قبل ٹیموں کی تیاری اور حکمت عملی پر بھی سوالات کھڑے کر دیے ہیں۔
ایگزو نیوز کے مطابق آئی سی سی کی جانب سے جاری کردہ تازہ ون ڈے پلیئرز رینکنگ میں عالمی کرکٹ کے بڑے ناموں کی پوزیشنز میں نمایاں تبدیلیاں سامنے آئی ہیں،جس نے شائقین کرکٹ کی توجہ اپنی جانب مبذول کر لی ہے۔بیٹرز کی فہرست میں نیوزی لینڈ کے ڈیرل مچل بدستور پہلی پوزیشن پر براجمان ہیں تاہم پاکستان کے سابق کپتان بابراعظم ایک درجے بہتری کے بعد چھٹے نمبر پر پہنچ گئے ہیں،جو ان کی فارم میں بتدریج بہتری کا عکاس ہے۔
رینکنگ کے مطابق آئرلینڈ کے ہیری ٹیکر ساتویں نمبر پر موجود ہیں جبکہ انگلینڈ کے تجربہ کار بیٹر جو روٹ نے چار درجے ترقی کرتے ہوئے آٹھویں پوزیشن حاصل کر لی ہے۔بھارت کے شریاس ایئر بھی ترقی کرتے ہوئے تیرہویں نمبر پر پہنچ گئے ہیں۔افغانستان کے رحمان اللہ گرباز،سری لنکا کے پاتھم نسانکا اور پاکستان کے سلمان علی آغا نے بھی دو،دو درجے بہتری کے ساتھ بالترتیب چودہویں،پندرہویں اور سولہویں پوزیشن سنبھال لی ہے،جو ان کھلاڑیوں کی حالیہ کارکردگی کا واضح ثبوت ہے۔دوسری جانب بولرز کی رینکنگ میں افغانستان کے سٹار لیگ سپنر راشد خان بدستور پہلی پوزیشن پر قابض ہیں۔انگلینڈ کے فاسٹ بولر جوفرا آرچر تیسرے جبکہ نیوزی لینڈ کے مچل سینٹنر چوتھے نمبر پر موجود ہیں۔پاکستان کے شاہین شاہ آفریدی نے شاندار کارکردگی کے باعث دو درجے ترقی حاصل کرتے ہوئے ساتویں پوزیشن حاصل کر لی ہے جبکہ حارث روف بھی دو درجے بہتری کے بعد بیسویں نمبر پر آ گئے ہیں،جو پاکستان کے فاسٹ بولنگ اٹیک کی مضبوطی کو ظاہر کرتا ہے۔
آل راونڈرز کی فہرست میں افغانستان کے عظمت اللہ عمرزئی بدستور سرفہرست ہیں جبکہ نیوزی لینڈ کے مائیکل بریسویل نے دو درجے ترقی کے بعد تیسری پوزیشن حاصل کر لی ہے،جس سے آل راونڈرز کی دوڑ مزید دلچسپ ہو گئی ہے۔یہ تازہ رینکنگ نہ صرف کھلاڑیوں کی انفرادی کارکردگی کا آئینہ دار ہے بلکہ آنے والے بین الاقوامی مقابلوں سے قبل ٹیموں کی مجموعی تیاری اور حکمت عملی پر بھی اہم اثر ڈال سکتی ہے۔