انٹرنیشنل کرکٹ کونسل (آئی سی سی) چیمپئنز ٹرافی کے لیے ابتدائی اسکواڈز جمع کرانے کی آخری تاریخ آج (اتوار) ہے۔
ذرائع کے مطابق آئی سی سی کے رہنما خطوط کے مطابق ٹیموں کو ایونٹ کے سپورٹ پیریڈ سے ایک ماہ قبل اپنے اسکواڈز جمع کرانے ہوں گے۔ چیمپئنز ٹرافی کیلئے سپورٹ پیریڈ 12 فروری سے شروع ہوگا۔
پی سی بی ذرائع نے انکشاف کیا کہ پاکستان اس عمل کو پورا کرنے کیلئے آئی سی سی کو نام بھیجے گا لیکن اس وقت ابتدائی اسکواڈ کا اعلان کرنے کا کوئی ارادہ نہیں ہے۔ قومی ٹیم کے اسکواڈ کا حتمی فیصلہ صائم ایوب کی فٹنس پر منحصر ہوگا۔
ذرائع نے یہ بھی عندیہ دیا کہ اسکواڈز کو 11 فروری تک حتمی شکل دی جاسکتی ہے جس کے بعد آئی سی سی کی منظوری درکار ہوگی۔
چیمپئنز ٹرافی سے قبل پاکستان سہ ملکی سیریز کھیلے گا۔ توقع ہے کہ اس سیریز کیلئے اسکواڈ میں بڑی حد تک کوئی تبدیلی نہیں کی جائے گی جس کا سامنا جنوبی افریقہ سے تھا۔ سہ فریقی سیریز میں فخر زمان کو شامل کیے جانے کا امکان ہے۔
چیمپئنز ٹرافی میں صائم ایوب کی شرکت کا انحصار ان کی فٹنس پر ہوگا اور توقع ہے کہ سہ فریقی اسکواڈ اس باوقار ٹورنامنٹ کیلئے ٹیم کا مرکز بنے گا۔