لاہور میں چیمپئنز ٹرافی کا میلہ آج سے شروع ہو رہا ہے۔ میگا ایونٹ کا چوتھا اور بڑا ٹکرا آج قذافی اسٹیڈیم میں ہوگا۔
روایتی حریف آسٹریلیا اور انگلینڈ قذافی اسٹیڈیم میں آج مد مقابل ہوں گے۔ اس موقع پر اسٹیڈیم کے اطراف میں سکیورٹی کے فول پروف انتظامات کئے گئے ہیں۔ شائقین کیلئے بھی چار درجاتی سیکورٹی حصار بنایا گیا ہے۔
آئی جی پنجاب ڈاکٹر عثمان انور نے کہا کہ آسٹریلیا اور انگلینڈ کے میچ کی سکیورٹی پر 12ہزار سے زائد پولیس افسران و اہلکار تعینات ہونگے۔ کھلاڑیوں کی رہائش گاہ، روٹس، اسٹیڈیم، اردگرد کی بلند عمارات پر سنائیپرز تعینات ہیں۔
انہوں نے کہا کہ انٹرنیشنل ایونٹ کی سکیورٹی کے پیش نظر ملک دشمن عناصر پر کڑی نظر رکھیں۔ پرامن اور محفوظ ماحول میں انٹرنیشنل میچز کا انعقاد یقینی بنانے کیلئے پرعزم ہیں۔
ڈاکٹر عثمان انور نے کہا کہ شائقین محفوظ ماحول میں انٹرنیشنل کرکٹ سے لطف اندوز ہونے کیلئے پنجاب پولیس سے تعاون کریں۔