نامور بھارتی موسیقار اے آر رحمان اور سائرہ بانو کی طلاق کے چند گھنٹوں بعد ہی ان کی گٹارسٹ موہنی ڈے نے بھی اپنے شوہر سے علیحدگی کا اعلان کر دیا۔
مارک ہارٹسچ اور موہنی ڈے نے انسٹاگرام پر ایک مشترکہ بیان میں کہا، پیارے دوستوں اور مداحوں بھاری دل سے اعلان کرتے ہیں کہ ہم علیحدہ ہو گئے ہیں۔ سب سے پہلے، ہم نے باہمی رضامندی سے یہ فیصلہ کیا ہے۔ ہم ابھی بھی اچھے دوست ہیں، باہمی رضامندی کے تحت علیحدگی بہترین راستہ ہے۔
ان کی ذاتی علیحدگی کے باوجود، دونوں نے اپنے کام کے سلسلے میں ایک ساتھ رہنے کا عہد کیا۔ ہم اب بھی کئی منصوبوں پر ایک ساتھ کام کریں گے جن میں MaMoGi اور موہنی دی گروپ شامل ہیں۔ ہم ہمیشہ اچھے طریقے سے مل کر کام کرنے پر فخر کرتے ہیں اور یہ سلسلہ جلد ختم نہیں ہونے والا۔ جوڑے نے اپنے مداحوں سے درخواست کی کہ وہ ان کی ذاتی زندگی میں مداخلت نہ کریں اور ان کے فیصلے کا احترام کریں۔
موہنی ڈے نے 11 سال کی عمر میں اپنے پیشہ ورانہ سفر کا آغاز کیا۔ وہ گان بنگلہ کی ونڈ آف چینج اور کوک اسٹوڈیو انڈیا جیسے پروجیکٹس پر اپنے کام کے لیے مشہور ہیں۔ انہوں نے اے آر رحمان کے ساتھ دنیا بھر میں 40 سے زائد شوز میں پرفارم کیا ہے۔ اس کے علاوہ موہنی نے ذاکر حسین، سیوامانی، اسٹیو وائی، مارکو منیمن، اور بہت سے دوسرے نامور موسیقاروں کے ساتھ بھی کام کیا ہے۔