ملک بھر میں گرمی کی شدت بڑھنے لگی ہے، اور محکمہ موسمیات کے مطابق آج سے 18 اپریل تک میدانی و بالائی علاقوں میں درجہ حرارت معمول سے 6 سے 7 ڈگری زیادہ رہنے کا امکان ہے۔
گرمی کی لہر نے اپریل کے وسط میں ہی شدت اختیار کرلی ہے، اور مختلف علاقے شدید ہیٹ ویو کی لپیٹ میں آچکے ہیں۔ محکمہ موسمیات نے سندھ، بلوچستان اور جنوبی پنجاب کے مختلف اضلاع میں ہیٹ ویو الرٹ جاری کیا ہے۔
رپورٹ کے مطابق، سندھ کے بعض علاقوں میں درجہ حرارت 40 ڈگری سے اوپر جا پہنچا ہے، جبکہ جنوبی پنجاب میں بھی گرمی کی شدت میں اضافہ ہوگیا ہے۔ آج دادو میں پارہ 46، نواب شاہ میں 45، سکھر اور حیدرآباد میں 43 ڈگری تک جانے کی پیش گوئی کی گئی ہے۔ ڈی جی خان، ملتان، سرگودھا میں 40 اور لاہور میں 37 ڈگری سینٹی گریڈ رہنے کا امکان ہے۔
کراچی سمیت ساحلی پٹی میں بھی درجہ حرارت معمول سے زائد رہنے کی توقع ہے، اور زیادہ سے زیادہ درجہ حرارت 36 ڈگری تک جا سکتا ہے۔
پنجاب اور بلوچستان کے بیشتر اضلاع میں موسم گرم اور خشک رہنے کے علاوہ، دوپہر کے بعد میدانی علاقوں میں تیز ہوائیں چلنے کی پیش گوئی ہے۔ ان علاقوں میں دن کے درجہ حرارت میں 3 سے 5 ڈگری سینٹی گریڈ اضافے کا امکان ہے۔
ہیٹ ویو کے پیش نظر پی ڈی ایم اے نے مختلف اضلاع میں انتظامات کیے ہیں، اور ماہرین صحت نے شہریوں کو دھوپ میں غیر ضروری باہر نکلنے سے گریز اور احتیاطی تدابیر اپنانے کا مشورہ دیا ہے۔
گزشتہ روز بھی جنوبی سندھ، جنوبی پنجاب اور بلوچستان میں شدید گرمی رہی، جہاں حیدرآباد، نواب شاہ، دادو، جیکب آباد، سکھر، ملتان اور رحیم یارخان میں درجہ حرارت 40 ڈگری سے تجاوز کر گیا۔ بہاولپور میں 39 ڈگری سینٹی گریڈ ریکارڈ کیا گیا۔