لاہور (ایگزو نیوز ڈیسک)اسلام آباد کی معروف خاتون وکیل نبا بختیاور کی جانب سے وزیر اعلیٰ پنجاب کے نام سے مارکیٹ میں لانچ کیا گیا پرفیوم ’مریم بلینڈز‘ سوشل میڈیا پر وائرل ہو گیا ہے،جب مریم نواز شریف نے سوشل میڈیا پر اس خراج تحسین کا مسکراتے ہوئے جواب دیا اور کہا کہ ’مجھے بھی ایک چاہیے‘ بس پھر کیا تھا سوشل میڈیا میں صارفین کا ملا جلا رد عمل سامنے آ رہا ہے تاہم آپ کے اس پرفیوم کی قیمت جان کر پسینے چھوٹ جائیں گے جبکہ خاتون وکیل کا کہنا ہے کہ ان کے شوہر تحریک انصاف کے ڈائی ہارڈ ورکر ہیں اور گھر میں خوب سیاسی بحث بھی ہوتی ہے۔
ایگزو نیوز کے مطابق پاکستان میں سیاست کو روایتی طور پر ایک سنجیدہ، سخت اور مردانہ شعبہ سمجھا جاتا رہا ہے تاہم حالیہ برسوں میں اس کے انداز میں تیزی سے تبدیلی آ رہی ہے،قیادت کا تصور اب صرف تقریروں اور فیصلوں تک محدود نہیں رہا بلکہ اس میں اظہار ، جمالیات اور علامتی اقدامات کو بھی اہمیت دی جا رہی ہے۔اسی سلسلے میں ایک منفرد اور تخلیقی مثال سامنے آئی جب معروف ہائی کورٹ وکیل نبا بختیاور نے پنجاب کی وزیر اعلیٰ مریم نواز شریف کے نام سے منسوب خوشبو “دی مریمز بلینڈ” متعارف کرائی، یہ خوشبو صرف ایک جسمانی احساس نہیں بلکہ ایک فکری اور سماجی علامت بھی ہے ، جو خواتین کے وقار اور قیادت کے خواب کی خوشبو سمجھی جا رہی ہے۔خاتون وکیل نبا بختیاور چند ہفتوں سے اسلام آباد میں مختلف وکیل رہنماوں کو پرفیوم گفٹ کرتی رہی ہیں تاہم اب ان کا یہ برینڈ مریم نواز کے سوشل میڈیا پر تبصرے کے بعد وائرل ہو گیا ہے اور سوشل میڈیا صارفین اس پر تنقید کر رہے ہیں جبکہ مریم نواز کے حامی اس ’محبت‘ کی تعریف کرنے میں مصروف ہیں۔
ایگزو نیوز سے گفتگو کرتے ہوئے خاتون وکیل نبا بختیاور کا کہنا تھا کہ میرے کوئی سیاسی مقاصد نہیں ہیں، میرے شوہر کا تعلق تحریک انصاف سے ہے تاہم سیاسی نظریات الگ ، الگ ہیں پھر بھی وہ مجھے سپورٹ کرتے ہیں،مریم نواز کی شخصیت سے متاثر ہو کر میں نے اس خوشبو کو لانچ کیا ہے جس کی قیمت 26 ہزار روپے رکھی گئی ہے تاہم جیسی شخصیت ہے اس لحاظ سے یہ قیمت کوئی معنی نہیں رکھتی، مجھے بڑا اچھا رسپانس ملا ہے اور میری خواہش ہے کہ میری مریم نواز شریف سے ون آن ون ملاقات ہو اور اب مجھے امید ہے کہ مریم نواز شریف تک میرا پیغام پہنچ گیا ہے اور جلد ہی ملاقات ہو جائے گی ۔ نبا بختیاور کا کہنا ہے کہ ’مریمز بلینڈ‘ محض ایک خوشبو نہیں بلکہ ایک خواب کی خوشبو ہے،جو ہر اس عورت کی نمائندگی کرتی ہے جو طاقت ، شناخت اور وقار چاہتی ہے،خوشبو صرف ذاتی پسند کا معاملہ نہیں بلکہ یہ ایک سماجی پیغام بھی بن سکتی ہے اور یہی پیغام ’دی مریمز بلینڈ‘ دے رہی ہے۔ نبا بختیاور کے مطابق یہ پروڈکٹ اس بات کا ثبوت ہے کہ سیاست صرف طاقت یا فیصلوں کا نام نہیں بلکہ اس میں خوبصورتی، وقار اور تخلیقی اظہار بھی شامل ہو سکتے ہیں ’دی مریمز بلینڈ‘ نہ صرف ایک خوشبو ہے بلکہ ایک جذبہ اور احساس ہے، جو خواتین کو یہ پیغام دیتی ہے کہ وہ اپنی شناخت اور خوابوں کے ساتھ جری انداز میں آگے بڑھیں۔