گل پلازہ سانحہ،شکوے،سوالات اور بے بسی،وزیر اعلیٰ سندھ کا وزیر اعظم سے رابطہ نہ ہونے کا انکشاف

کراچی(ایگزو نیوز ڈیسک)شہر قائد کے قلب میں واقع گل پلازہ میں پیش آنے والے دلخراش آتشزدگی کے واقعے نے نہ صرف قیمتی انسانی جانیں نگل لیں بلکہ ریاستی نظام، شہری منصوبہ بندی اور وفاق و صوبے کے درمیان رابطے کی کمزوریوں کو بھی بے نقاب کر دیا۔ وزیراعلیٰ سندھ سید مراد علی شاہ نے اس سانحے پر افسوس اور دکھ کا اظہار کرتے ہوئے انکشاف کیا ہے کہ واقعے کے بعد تاحال وزیراعظم پاکستان کی جانب سے ان سے کوئی رابطہ نہیں کیا گیا، جو ایک بڑے قومی المیے پر وفاقی سطح کی سرد مہری کا تاثر دیتا ہے۔
ایگزو نیوز کے مطابق وزیراعلیٰ سندھ سید مراد علی شاہ کا کہنا تھا کہ گل پلازہ میں لگنے والی آگ ایک انتہائی افسوسناک واقعہ ہے جس میں ایک فائر فائٹر سمیت پانچ شہری جاں بحق ہوئے جبکہ ابتدائی اطلاعات کے مطابق شارٹ سرکٹ آگ لگنے کی ممکنہ وجہ ہو سکتا ہے۔ان کے مطابق پلازہ میں ایک ہزار سے زائد دکانیں قائم تھیں اور 60 سے زائد افراد کے لاپتہ ہونے کی اطلاعات موصول ہو چکی ہیں،جو اس حادثے کی سنگینی کو مزید بڑھا دیتی ہیں۔مراد علی شاہ نے واضح کیا کہ امدادی سرگرمیاں تا حال جاری ہیں اور ریسکیو ادارے اپنی تمام تر صلاحیتوں کے ساتھ متاثرین تک پہنچنے کی کوشش کر رہے ہیں تاہم انہوں نے اس امر پر افسوس کا اظہار کیا کہ ایسے المناک سانحے کے باوجود وزیراعظم کی جانب سے نہ کوئی فون کال آئی اور نہ ہی کسی سطح پر رابطہ کیا گیا۔

ان کا کہنا تھا کہ کچھ عناصر اس سانحے پر سیاست چمکانے کی کوشش کر رہے ہیں مگر وہ انتشار پھیلانے والوں پر توجہ دینا مناسب نہیں سمجھتے۔وزیراعلیٰ سندھ نے دعویٰ کیا کہ سندھ حکومت متاثرین کو ریلیف فراہم کرے گی اور تاجروں کے نقصانات کا شفاف طریقے سے ازالہ کیا جائے گا،حکومت کی کوشش ہوگی کہ مالی امداد سیاسی نعروں کے بجائے عملی اقدامات کی صورت میں سامنے آئے۔انہوں نے اس بات کا بھی اعتراف کیا کہ عمارت کے اندر آگ بجھانے کے لیے کوئی مناسب انتظامات موجود نہیں تھے اور بغیر کسی جامع فائر سیفٹی اسٹڈی کے کئی منزلہ عمارت تعمیر کرنے کی اجازت دی گئی،جو شہری انتظامیہ اور متعلقہ اداروں کی سنگین غفلت کی عکاسی کرتا ہے۔مراد علی شاہ کا کہنا تھا کہ آگ لگنے کی حتمی وجہ تاحال معلوم نہیں ہو سکی اور اس حوالے سے تحقیقات جاری ہیں۔انہوں نے اس تاثر کو بھی رد کیا کہ وہ واقعے کے وقت کراچی سے باہر تھے اور کہا کہ افواہیں پھیلانے والوں کو جواب دینا وقت کا ضیاع ہے،سندھ حکومت اپنا کام کر رہی ہے اور صورت حال کو کنٹرول میں لانے کے لیے تمام وسائل بروئے کار لائے جا رہے ہیں۔واضح رہے کہ گل پلازہ کا سانحہ ایک بار پھر اس تلخ حقیقت کی یاد دہانی ہے کہ کراچی جیسے میگا سٹی میں فائر سیفٹی،عمارتوں کی منظوری اور ہنگامی ردعمل کا نظام شدید زبوں حالی کا شکار ہے۔ایک طرف قیمتی جانوں کا ضیاع اور درجنوں خاندانوں کی بے یقینی،دوسری جانب وفاقی و صوبائی قیادت کے درمیان خاموشی اور شکوے،یہ سب مل کر اس المیے کو محض ایک حادثہ نہیں بلکہ ایک اجتماعی ناکامی بنا دیتے ہیں،جس کا حساب ابھی باقی ہے۔