حکومت نے جاری مذاکرات کو ختم کرنے کے پاکستان تحریک انصاف (پی ٹی آئی) کے فیصلے کو "بدقسمتی” قرار دیتے ہوئے، پی ٹی آئی قیادت سے اپنے فیصلے پر نظر ثانی کرنے کی اپیل کی ہے۔
حکومتی مذاکراتی کمیٹی کے ترجمان مسلم لیگ (ن) کے سینیٹر عرفان صدیقی نے پارلیمنٹ ہاؤس کے باہر صحافیوں سے بات کرتے ہوئے کہا کہ جب پی ٹی آئی ہمارا دروازہ کھٹکھٹایا تھا اور سوالنامہ دیا تھا، تو انہیں ہمارے جوابات سننے چاہیے تھے۔
اُن کا یہ بیان اس وقت سامنے آیا جب پی ٹی آئی کے بانی عمران خان نے سات دن کی مدت میں عدالتی کمیشن کے قیام میں ناکامی کی وجہ سے حکومت کے ساتھ مذاکرات کو "منسوخ” کر دیا۔
راولپنڈی کی اڈیالہ جیل کے باہر میڈیا سے بات کرتے ہوئے پی ٹی آئی کے چیئرمین بیرسٹر گوہر علی خان نے کہا کہ خان نے تاخیر پر مایوسی کا اظہار کرتے ہوئے کہا کہ جوڈیشل کمیشن کی تشکیل کیلئے حکومت کی ناکامی سے مذاکرات جاری رکھنے کی کوئی وجہ نہیں ہے۔
عرفان صدیقی نے صحافیوں سے بات کرتے ہوئے کہا کہ سابق حکمران جماعت کو اپنے چارٹر آف ڈیمانڈز پیش کرنے میں 42 دن لگے اور اب وہ چاہتے ہیں کہ ہم سات دنوں میں عدالتی کمیشن تشکیل دیں۔ ہم سمجھتے ہیں کہ 28 جنوری کو سات دن مکمل ہونے تھے۔ انہوں نے حیرت کا اظہار کرتے ہوئے کہا کہ پی ٹی آئی نے مذاکرات سے دستبردار ہونے کی دھمکی کیوں دی۔