اسٹیبلشمنٹ ڈویژن نے سرکاری معلومات اور دستاویزات کے افشاء کو روکنے کیلئے سرکاری ملازمین کو بغیر اجازت سوشل میڈیا استعمال کرنے سے روک دیا ہے۔
تفصیلات کے مطابق آج جاری کردہ ایک دفتری میمورنڈم میں حکومت نے ملازمین کو پابند کیا ہے کہ وہ گورنمنٹ سرونٹ (کنڈکٹ) رولز 1964 کی پابندی کریں۔ میمورنڈم میں مزید کہا گیا ہے کہ سرکاری ملازم بغیر اجازت سوشل میڈیا کی کوئی بھی ایپلی کیشن استعمال نہیں کر سکے گا۔
میمورنڈم کے مطابق سرکاری ملازمین ایسی رائے یا حقائق کا اظہار نہیں کر سکتے جس سے حکومت کی ساکھ متاثر ہو، ملازمین کو حکومتی پالیسی، فیصلوں، قومی خودمختاری اور وقار کے خلاف بات کرنے کی اجازت نہیں ہے۔ ہدایات کی خلاف ورزی پر ملازمین کے خلاف سخت کارروائی کی جائے گی۔
میمورنڈم میں کہا گیا کہ سرکاری ملازم غیر متعلقہ افراد کے ساتھ سرکاری دستاویزات اور معلومات شیئر نہیں کر سکتا۔ میمورنڈم میں اداروں پر بھی زور دیا گیا ہے کہ وہ قابل اعتراض مواد کو ہٹانے کیلئے اپنے سوشل میڈیا پلیٹ فارمز کی نگرانی کریں۔ خیال رہے کہ وفاقی سیکرٹریوں، ایڈیشنل سیکرٹریوں، محکموں کے سربراہوں، چیف سیکرٹریوں کو بھی میمورنڈم پر عمل درآمد کرنے کی ہدایت کی گئی ہے۔