پاکستانی دفتر خارجہ نے یونانی جزیرے کریٹ کے جنوب میں کشتی الٹنے سے چار پاکستانیوں کے جاں بحق ہونے کی تصدیق کی ہے۔
اس سے قبل ہفتے کے روز غیر ملکی میڈیا نے اطلاع دی تھی کہ تارکین وطن کو لے جانے والی کشتی جنوبی یونان کے جزیرے گاوڈوس کے قریب الٹ گئی جس کے نتیجے میں کم از کم پانچ افراد ہلاک ہو گئے۔
ایک بیان میں دفتر خارجہ کے ترجمان نے کہا کہ ہم گہرے دکھ کے ساتھ اعلان کرتے ہیں کہ یونانی حکام کی جانب سے شیئر کی گئی تازہ ترین معلومات کے مطابق ہفتے کو یونانی جزیرے کریٹ کے جنوب میں کشتی الٹنے سے جاں بحق ہونے والوں میں چار پاکستانیوں کی شناخت ہو گئی ہے۔
انہوں نے مزید کہا کہ ایتھنز میں ہمارا مشن یونانی حکام کے ساتھ رابطے میں ہے تاکہ بچ جانے والوں کو سہولت فراہم کی جا سکے اور لاشوں کو وطن واپس لایا جا سکے۔
سفارت خانے کے اہلکار بازیاب کرائے گئے پاکستانیوں سے ملنے اور انہیں ہر قسم کی مدد فراہم کرنے کیلئے کریٹ پہنچ گئے ہیں۔
ایتھنز میں پاکستان کا سفارت خانہ ہیلینک کوسٹ گارڈ اور چانیا کے کوسٹ گارڈ کے ساتھ رابطے میں تھا، جو ریسکیو آپریشن کر رہے تھے۔