کلکتہ (ایگزو نیوز ڈیسک)ٹی 20 ورلڈ کپ کے پہلے سیمی فائنل میں نیوزی لینڈ نے جنوبی افریقا کو 170 رنز کے ہدف کے تعاقب میں شاندار کارکردگی دکھاتے ہوئے صرف ایک وکٹ کے نقصان پر ہدف حاصل کر کے فائنل میں جگہ بنا لی۔
ایگزو نیوز کے مطابق کلکتہ کے ایڈن گارڈنز میں کھیلے گئے میچ میں نیوزی لینڈ کے کپتان مچل سینٹنر نے ٹاس جیت کر جنوبی افریقا کو پہلے بیٹنگ کی دعوت دی۔پہلے بیٹنگ کرتے ہوئے پروٹیز نے مقررہ 20 اوورز میں 8 وکٹوں کے نقصان پر 169 رنز بنائے۔مارکو یانسن 55 رنز بنا کر ناقابل شکست رہے جبکہ ڈیوالڈ بریوس 34،سٹبز 29،ایڈن مارکرم 18، کوئنٹن ڈی کاک 10 اور ڈیوڈ ملر 6 رنز بنا کر آوٹ ہوئے۔نیوزی لینڈ کی جانب سے میٹ ہینری،کول مکونکی اور رچن رویندرا نے 2،2 وکٹیں حاصل کیں جبکہ لوکی فرگوسن اور جیمز نیشم نے ایک ایک کھلاڑی کو آوٹ کیا۔170 رنز کے ہدف کے تعاقب میں نیوزی لینڈ نے شاندار بیٹنگ کا مظاہرہ کیا۔فن ایلن نے 33 گیندوں پر 100 رنز بنا کر نہ صرف ناقابل شکست رہے بلکہ ٹی 20 ورلڈ کپ کی تیز ترین سنچری کا ریکارڈ بھی قائم کیا۔ٹم سیفٹ نے 58 رنز شامل کئے جبکہ رچن رویندرا 13 رنز پر ناٹ آوٹ رہے۔اس کارکردگی نے نیوزی لینڈ کو پروٹیز کے خلاف واضح برتری دلا دی اور ٹیم نے آسانی سے ہدف مکمل کر کے فائنل تک رسائی حاصل کر لی۔
یہ میچ ٹی 20 ورلڈ کپ میں نیوزی لینڈ کے بیٹنگ اور فیلڈنگ سٹینڈرڈز کا شاندار مظاہرہ تھا جبکہ جنوبی افریقا کے کھلاڑی کافی مواقع ضائع کرتے نظر آئے۔اس کامیابی کے بعد نیوزی لینڈ اب دوسرے سیمی فائنل میں بھارت اور انگلینڈ کے مقابلے کے فاتح کے ساتھ فائنل میں مد مقابل ہوگی،جو کل ممبئی میں کھیلا جائے گا۔فن ایلن کی 33 گیندوں میں سنچری نے ٹی 20 ورلڈ کپ میں تیز ترین سنچری کا نیا ریکارڈ قائم کیا،جس نے کرس گیل کا 2016 کا ریکارڈ توڑ دیا تھا،جو انگلینڈ کے خلاف 47 گیندوں پر مکمل ہوا تھا۔نیوزی لینڈ کی شاندار بیٹنگ، مضبوط حکمت عملی اور فیلڈنگ نے سیمی فائنل میں ان کی برتری کو واضح کیا اور ٹیم کی فائنل میں پہنچنے کی امیدیں بڑھا دی ہیں۔یہ میچ کرکٹ شائقین کے لیے یادگار رہا،خاص طور پر فن ایلن کے تاریخی کارنامے کی بدولت۔