ایف بی آر کی نئی کارروائی، ایک لاکھ 74 ہزار نان فائلرز کو نوٹسز جاری،قانونی کارروائی کی وارننگ

اسلام آباد(ایگزو نیوز ڈیسک)فیڈرل بورڈ آف ریونیو (ایف بی آر) نے ملک میں ٹیکس نیٹ میں عدم شمولیت کے خلاف ایک بڑے اقدام کے تحت ایک لاکھ 74 ہزار نان فائلرز کی نئی فہرست تیار کر لی ہے۔ حکام کے مطابق لاہور، راولپنڈی، ملتان اور فیصل آباد کے رہائشیوں کو شناختی کارڈ کی بنیاد پر آن لائن اور گھروں پر نوٹسز بھیجے جا رہے ہیں تاکہ وہ اپنا قانونی ٹیکس ریٹرن جمع کرائیں۔
ایگزو نیوز کے مطابق فہرست میں شامل افراد کے پاس گاڑیاں، پلاٹس، گھروں کے مالکانہ حقوق اور نقد رقم موجود ہے، تاہم ان میں کچھ گھریلو خواتین بھی شامل ہیں۔ ایف بی آر کی جانب سے جاری نوٹس میں کہا گیا ہے کہ نان فائلرز کو نوٹس موصول ہونے کے ایک ہفتے کے اندر پچھلے تین سال کے ٹیکس ریٹرنز جمع کرانا ضروری ہے۔ اگر مقررہ وقت میں دستاویزات جمع نہ کروائی گئیں تو نان فائلرز کے خلاف قانونی کارروائی کی جائے گی۔ایف بی آر کے حکام نے واضح کیا ہے کہ وہ خود سے جمع کرائے گئے ریٹرنز کو فوری طور پر درست اور مستند نہیں مانیں گے بلکہ قانونی کارروائی کی بنیاد صرف تصدیق شدہ معلومات پر ہوگی۔
یہ اقدام ملک میں ٹیکس نیٹ کو وسعت دینے، شفافیت بڑھانے اور غیر فائلرز کو قانونی طور پر ذمہ دار بنانے کے لیے اٹھایا گیا ہے۔ حکام کے مطابق، نوٹسز بھیجنے کے بعد اگر افراد تعاون کرتے ہیں اور قانونی ریٹرن جمع کراتے ہیں تو کارروائی سے استثنیٰ حاصل ہو سکتا ہے تاہم نان فائلرز کی طرف سے عدم تعاون کی صورت میں ایف بی آر سخت کارروائی کرے گا۔ماہرین کے مطابق یہ مہم نہ صرف ٹیکس کلچر کو بہتر بنانے بلکہ ملکی معیشت میں ریونیو بڑھانے میں اہم کردار ادا کرے گی، جبکہ اس سے شہریوں میں ٹیکس قوانین کی پاسداری کے حوالے سے شعور بھی پیدا ہوگا۔اس نئی کارروائی کے بعد اب شہریوں کو اپنی مالی ذمہ داریوں کے بارے میں فوری اقدام اٹھانے کی ضرورت ہے تاکہ قانونی مشکلات سے بچا جا سکے۔