بالی وڈ کے مشہور اداکار منوج کمار 87 سال کی عمر میں انتقال کر گئے۔
بھارتی میڈیا کے مطابق، منوج کمار کو طبعیت خراب ہونے پر ممبئی کے کوکیلا بین دھیرو بائی امبانی اسپتال میں داخل کرایا گیا تھا، جہاں دل کی پیچیدگیوں اور پھپڑوں کی خرابی کے باعث جمعہ کی صبح ان کا انتقال ہوگیا۔
فلم انڈسٹری اور بھارتی وزیراعظم نریندر مودی نے ان کے انتقال پر گہرے دکھ کا اظہار کیا ہے۔
منوج کمار 4 جولائی 1937 کو پاکستان کے شہر ایبٹ آباد میں پیدا ہوئے تھے، اور تقسیم کے بعد ان کی فیملی بھارت منتقل ہوگئی۔ انہوں نے 1957 میں بالی وڈ میں قدم رکھا، اور 1965 میں ان کی فلم "گمنام” نے شاندار کامیابی حاصل کی۔
منوج کمار کو 1975 میں فلم "روٹی کپڑا اور مکان” کے لیے بہترین ہدایت کار کا ایوارڈ ملا، اور وہ بھارتی جنتا پارٹی کے رہنما بھی رہے۔ انہیں بھارت کے سب سے بڑے سول اعزاز "پدما شری” اور دادا صاحب پھالکے ایوارڈ سے نوازا گیا۔