سری لنکا کے خلاف ٹرائی نیشن فائنل میں ایمپائر کے فیصلے پر احتجاج مہنگا پڑ گیا،اوپننگ بلے باز فخر زمان کو بڑی سزا سنا دی گئی

اسلام آباد(ایگزو نیوز ڈیسک)پاکستان کے اوپننگ بلے باز فخر زمان کو سری لنکا کے خلاف ٹرائی نیشن سیریز کے فائنل میں آئی سی سی کوڈ آف کنڈکٹ کی خلاف ورزی پر سزا دی گئی ہے۔
آئی سی سی کی جانب سے جاری کردہ اعلامیے کے مطابق فخر زمان نے میچ کے اہم مرحلے میں ایل بی ڈبلیو آوٹ دیے جانے کے بعد ایمپائر کے فیصلے پر احتجاج کیا، جو کہ کوڈ آف کنڈکٹ کے آرٹیکل 2.3 کے تحت لیول ون کی خلاف ورزی شمار ہوتی ہے۔اس کے نتیجے میں فخر زمان کو میچ فیس کا دس فیصد جرمانہ عائد کیا گیا جبکہ ان کے ڈسپلنری ریکارڈ میں ایک ڈی میرٹ پوائنٹ بھی شامل کردیا گیا ہے۔ آئی سی سی قوانین کے مطابق اگر کسی کھلاڑی کے دو سال کے اندر چار ڈی میرٹ پوائنٹس جمع ہو جائیں تو اسے ایک میچ کی پابندی کا سامنا کرنا پڑ سکتا ہے۔میچ کے دوران یہ واقعہ اس وقت پیش آیا جب فخر زمان کو ایل بی ڈبلیو آوٹ دیا گیا اور انہوں نے سخت لہجے میں فیصلے کو چیلنج کیا۔ ایمپائر کی رپورٹ کے بعد میچ ریفری نے تمام شواہد کا جائزہ لیا اور اس کے مطابق سزا کا فیصلہ جاری کیا گیا۔یہ اقدام آئی سی سی کی جانب سے کھلاڑیوں میں نظم و ضبط قائم رکھنے اور ایمپائرز کے فیصلوں کا احترام یقینی بنانے کی کوشش کے تحت کیا گیا ہے۔