لزبن(ایگزو نیوز ڈیسک)یورپ میں کیش لیس معیشت کی تیزی کے باوجود بینک آف پرتگال سمیت متعدد یورپی مرکزی بینکوں نے شہریوں کو ہنگامی حالات کے پیشِ نظر گھروں میں نقد رقم کا ذخیرہ رکھنے کی سخت ہدایت جاری کر دی ہے، ورنہ کسی بھی اچانک بحران میں بنیادی ضروریات تک رسائی ناممکن ہو جائے گی۔
بینک آف پرتگال کی آفیشل ویب سائٹ پر جاری کردہ رہنما اصولوں کے مطابق ہر بالغ شہری کو کم از کم 70 یورو جبکہ نابالغ بچے کے لیے 30 یورو گھر میں محفوظ رکھنا لازمی ہے۔ ایک عام چار رکنی خاندان (میاں بیوی اور دو بچے) کے لیے یہ رقم 200 یورو بنتی ہے، جو چھوٹے نوٹوں میں تقسیم کر کے گھر کے محفوظ مقام پر رکھی جائے۔یہ انتباہ 28 اپریل 2025 کو پرتگال بھر میں ہونے والے تاریخی پاور بریک ڈاون کے بعد سامنے آیا، جب ملک کا 80 فیصد بجلی کا نظام اچانک مفلوج ہو گیا۔ ٹرینیں، میٹرو، الیکٹرک بسیں اور ٹرام سسٹم مکمل طور پر بند ہو گئے، اے ٹی ایم مشینیں غیر فعال ہوئیں، کارڈ پیمنٹس ناکام ہوئے، موبائل نیٹ ورکس ڈاون ہوئے اور وائی فائی سروسز معطل ہو گئیں۔ لزبن، پورٹو اور فارو شہروں میں عوام گھنٹوں سڑکوں پر پھنسے رہے، دکانیں بند ہوئیں اور ہسپتالوں میں ایمرجنسی جنریٹرز پر انحصار کرنا پڑا۔
بینک آف پرتگال کے گورنر ماریو سینٹینو نے میڈیا بریفنگ میں کہا کہ یہ واقعہ ایک وارننگ تھا۔ ڈیجیٹل انفراسٹرکچر کی ناکامی نے ثابت کر دیا کہ کیش لیس معاشرہ مکمل طور پر محفوظ نہیں۔شہریوں کو چاہیے کہ وہ ہمیشہ 3 سے 5 دن کی بنیادی ضروریات کے لیے نقد رقم گھر میں رکھیں۔یورپی سینٹرل بینک (ای سی بی) نے بھی اس ہدایت کی تائید کرتے ہوئے تمام رکن ممالک کو مشورہ دیا ہے کہ وہ اپنے شہریوں کو اسی طرز پر گائیڈ لائنز جاری کریں۔جرمنی کے بنڈس بینک نے 100 یورو فی بالغ،ہالینڈ کے ڈی نیڈرلینڈسچے بینک نے 50 یورو اور سپین کے بینکو ڈی ایسپانا نے 80 یورو کی حد تجویز کی ہے۔ماہرینِ معیشت کا کہنا ہے کہ سائبر حملے،قدرتی آفات، دہشت گردی یا تکنیکی خرابی کی صورت میں ڈیجیٹل ادائیگیاں فوری طور پر ناکام ہو سکتی ہیں۔پرتگال واقعے میں 6 گھنٹے کی بندش نے 1.2 ارب یورو کا معاشی نقصان پہنچایا اور 40 لاکھ شہری متاثر ہوئے۔حکام نے شہریوں سے اپیل کی ہے کہ وہ کیش کو چھوٹے نوٹوں (5، 10، 20 یورو) میں تقسیم کریں،واٹر پروف کنٹینر میں رکھیں اور ہر 6 ماہ بعد چیک کریں۔اس کے علاوہ گھر میں ٹارچ،بیٹریاں،پانی اور غیر فاسد ہونے والی غذائیں بھی ذخیرہ کرنے کی ہدایت کی گئی ہے۔یورپی کمیشن نے اعلان کیا ہے کہ آئندہ سال سے تمام رکن ممالک میں “ہنگامی کیش ریزرو” کو قومی سیکیورٹی پالیسی کا حصہ بنایا جائے گا۔